Maimane se plan vir SA

Mmusi Maimane, leier van die DA. Foto: DA/Twitter

Mmusi Maimane, leier van die DA, het Saterdag die party se “plan vir verandering” uiteengesit met die bekendstelling van sy verkiesingsmanifes.

Die DA se verkiesingsmanifes is by die Rand-stadion in Johannesburg bekendgestel waar duisende DA-ondersteuners bymekaargekom het.

Maimane het gesê die land is besig om na ʼn afgrond te beweeg. “Ons kort verandering en ons kort dit nou. Die DA het ʼn plan – ʼn agenda vir hervorming – om die doel te bereik.”

Die DA-leier het gesê die party se verkiesingsmanifes is ʼn plan om ʼn regering te bou wat vir almal werk. Maimane het hierna verduidelik hoe dié Suid-Afrika volgens hom sal lyk.

“Dit is ʼn land wat werk. Dit is ʼn land waar burgers opstaan en werk toe gaan en waar die regering vir sy burgers werk. Ek het ʼn droom dat daar in elke huishouding ʼn werk is. Dit kan nie wees dat vier uit elke 10 Suid-Afrikaanse huishoudings geen inkomste het nie.”

Mmusi Maimane, leier van die DA. Foto: DA/Twitter

Volgens Maimane sal dit gedoen word deur kleinsakeondernemings en entrepreneurs vryheid te gee, asook die ekonomie te herbou deur sektore wat ʼn sleutelrol in werkskepping speel te vergroot.

“Ons sal ook ʼn jaar lange nasionale burgerlike diens instel wat as ʼn brug sal dien tussen skool en die wêreld van werk én vir skoolverlaters waardevolle werkervaring sal bied.”

Maimane droom ook daarvan om alle Suid-Afrikaners die eienaars van hul huise te maak met volle titelaktes. “Ek stel nie belang in ʼn stelsel waar mense aan die genade van die regering oorgelewer is op grond wat deur die staat besit word nie. Ons staan nie net vir die doel daarvan die wysigings van die Grondwet teen nie. Ons wil verseker dat artikel 25 beskerm word. Die saak sal in die hof beland.”

Duisende DA-ondersteuners het by die Rand-stadion bymekaargekom vir die bekendstelling van die party se verkiesingsmanifes. Foto: DA/Twitter

ʼn Huis beteken egter niks indien jy nie veilig voel daarin nie, meen Maimane. “In die Suid-Afrika wat ek wil bou, sal ons polisiediens goed opgelei wees, die nodige hulpbronne hê en gemotiveerd wees. Ek wil ook ʼn landelike veiligheidseenheid hê om seker te maak dat al ons burgers wat op plase woon, beskerm word.”

Verder wil Maimane ʼn land hê met veilige grense, ʼn land waar daar energiesekerheid is en ʼn land waar daar op die toekoms gefokus word wanneer dit kom by kinders se opleiding.

“Die Suid-Afrika wat ek wil bou, sal geen plek hê vir korrupsie en korrupte politici nie. Indien jy ʼn korrupte politikus is, sal jy minstens 15 jaar tronk toe gaan. Tenders sal in die openbaar toegeken word en geen politikus sal met die regering sake doen nie.”

Maimane meen indien staatsbeheerde instellings wat nie werk nie verkoop word, sal korrupsie in die slag bly. “Indien ons die kabinet met die helfte verminder en ophou om geld aan onnodige luukshede te bestee kan ons die land van ons drome bou.”

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

69 Kommentare

jongste oudste gewildste
Adam

Die eerste keer wat ek kan onthou dat ek byna volmondig met Maimane saamstem, maar hoeveel van die inhoud daarvan kan ons vertrou sal gebeur. Die DA is ‘n Multiplex party wat alles en almal se belange wil dek en dit is gewoon onmoontlik. Weliswaar ‘n goeie uiteensetting wat nodig is om orde en voorspoed te bewerkstellig, maar vakbonde sal sy pogings in die wiele ry.

Erdwurm

Sal verseker DA stem en vir Mmusi. Blou is ‘n pragtige kleur!!

Johanna Botha

Al die wonderlike planne en dele van centurion is al vir meer as 24 uur sonder krag ( nie die substasie probleem nie) Harare het meer krag as die plek !

Hennie

Wat van White Privilege Mmusi. Jy is mos met een getroud ook, nie waar nie! Jy kry nie die Afrikaner stem hierdie jaar nie.

KrokidilBotha

Blah blah. DA = ANC light