Maimane skryf aan Ramaphosa oor ekonomie se ‘donker dag’

Mmusi Maimane, leier van die DA (Foto: DA)

Mmusi Maimane, leier van die DA, het Woensdag aan pres. Cyril Ramaphosa geskryf in ’n beroep aan die president om ’n noodherstelplan vir die ekonomiekrisis op te stel ná Dinsdag se “donker dag” vir die land se ekonomie.

Maroela Media het vroeër berig Statistieke Suid-Afrika (StatsSA) het gister die bevindinge van sy jongste navorsing bekend gemaak. Dit toon dat Suid-Afrika se werkloosheidsyfer op 29% staan, die hoogste sedert daar in 2008 met die kwartaallikse opname begin is.

“Ek skryf om ’n beroep op u te doen om [landsburgers] toe te spreek oor gister se werkloosheidsyfers wat deur StatsSA vrygestel is en die aankondiging van Eskom se rekordverliese, om voorts ’n herstelplan vir die ekonomiekrisis op te stel saam met die betrokke belanghebbendes van die regering en politieke partye ten einde die ekonomie en Eskom te hervorm, asook die werkafleggings stop te sit,” het Maimane geskryf.

“Ek wil oplossings aan u bied om ons ekonomie te help red. Die oplossings is gegrond op ingrypings wat al in DA-geleide regerings oor die hele Suid-Afrika gewerk het. As u in belang van Suid-Afrika werk, sal die DA met u saamwerk – net soos u met alle regeringsvlakke sal moet saamwerk om die ekonomie te laat groei en werksgeleenthede te skep.”

Maimane het in sy skrywe gesê dat Suid-Afrikaners leierskap van die land se president asook dringende optrede verwag om staatsinstansies reg te ruk.

Hy het gesê die DA glo dat Ramaphosa die verdeling van Eskom in twee behoort aan te kondig, asook die verkoop van die Suid-Afrikaanse Lugdiens (SAL) en nienoodsaaklike bates by die Suid-Afrikaanse Uitsaaikorporasie (SAUK). Die DA wil ook hê dat die land se arbeidswette hervorm word om meer ondernemings in staat te stel om werk te skep en die nasionale minimumloon te skrap.

Maimane wil dit volgens hom aan Ramaphosa duidelik maak dat daar oplossings beskikbaar is om die land se ekonomie te red. Dié oplossings is gegrond op ingrypings wat reeds vantevore onder DA-bewind gewerk het.

“Die amptelike opposisie het reeds voorstelle oor ekonomiese hervorming beproef om die ekonomie te help herstel van hierdie krisis. Ek sien uit daarna om saam met u te werk om die ekonomie te help omkeer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

20 Kommentare

Gert van Wierdapark ·

Die “Donker dag” vir die land het al ‘n kwart eeu gelede begin!!!

Peet ·

Is daar wragtag nog ‘n regdenkende mens wat dink énige iemand in die ANC stel belang in die opregte vooruitgang van Suid-Afrika…?

Ekke Dink ·

Nes Zuma moet Ramaphosa hom na die howe wend om die saak te probeer regstel. Ek hoop sy termyn strek oor die volgende 25 jaar sodat hy die bollie wat sy voorgangers en die kaders in sy huidige parlement en top 6 reg te maak, As die bevolkings aanwas en vigs op die huidige trant aangaan, sal sowat 2 000 000 mense hiv positief wees. Hy sal sekerlik daaraan moet begin dink om meer hospitale en klinieke te bou. Los maar die bou van gratis huise.

Clipper ·

Ek is oortuig daarvan dat die anc nie die aanbod sal aanvaar want daar is nie ‘n ietsie om in die sak te steek nie. Ramaphisa is ook te veel van n swak leier en bestuurder om iets daadwerkliks te doen om die ekonomie om te draai

Susna ·

Dries, Stem 100% saam met jou. Enigste oplossing om totale ondergang te vermy. Die Unies moet die grootste skuld aan die verwoesting kry.

Marius ·

En dan cheer hulle Johann Rupert aan om die land te verlaat….. Die absolute oningeligde onnoselheid gaan my verstand ten bowe. En as alles finaal inplof en almal agterna afgesleep is, gaan hulle die victim-rol speel……en dit op die wittes blameer…. Ek is SO spyt ek het nie hierdie land verlaat toe my ouers my gesmeek het om dit te doen nie, en nou is dit te laat vir my. Ek is DIEP bekommerd oor my ou dag.

Pieter ·

Al waar aan die anc belangstel is om te kyk waar en hoe kan hulle ons belasting geld mors met die res het hulle nie n saak nie die land het sy alie gesien

TN ·

Anders as die res stel die DA moontlike oplossings voor wat natuurlik nie aanvaar sal word nie aangesien die res konflik nodig het vir hulle politieke voortbestaan .

B ·

En in die moeilike tye het ‘n sekere groep dit NOG moeiliker agv wetgewing teen hulle velkleur.

John ·

Wat in Pretoria aangaan is ANC-geborg… Daar word reeds gewerk aan die munisipale verkiesing… so ook die Alexandra-drama. Die ANC het geen belang by ‘beter word’ nie. Donker dae is hier om te bly. Die Ses voel vere vir die land. Hulle is nou die baas en dis al wat tel….

TN ·

Probeer jy ook net afbreek soos Malema of stel jy in oplossings belang ?

fred ·

praat help nie meer nie…..doen weg met BEE en dan kan jy weer praat mr DA…

Jerry ·

Ai tog opposisie partye, julle moes die ANC se staatskaping gestop het, maar julle kon nie! Nou moet julle die ANC se groter skade wat hulle aanrig om SOE’s met belastingbetalersgeld en pensioengeld kamtig te herstel stop, maar julle kan ook nie! Die ekonomie kan net herstel word sonder die ANC en sonder die se kamtige herstel van die SOE’s! Die ANC wil steeds hulself verder verryk met geld wat hulle wil he, daarom moet die geldkraan na die ANC staat binnelands en vanaf die buiteland, IMF heeltemal toegedraai word en na privaatalternatiewes gekanaliseer word. Doen dit, dan doen julle werklikwaar iets vir n vryemark SA! Doen dit nie en die vryemark gaan soos mis voor die son verdwyn, want dit is waarheen die ANC en die se vakbonde, mik!

Anoniem ·

Die ANC is te trots om raad van die DA te aanvaar, al is dit goeie raad.

Heinrich ·

Jy droom lekker Mmusi, as Ramapadda enigsins sal erken dat julle reg was beteken dit dat hy erken dat hulle verkeerd was. Erkenning van foute bestaan nie in ANC-DNA nie.
Om die regte ding te doen en nie te leer van Zim nie, blykbaar ook nie…

AJBotha ·

Nee nie te trots nie. Self behep. Dis mos hulle wat alles weet. Kyk waar sit ons na n kwart eeu.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.