Majoor by MRK verkla oor FB-uitlating

Majoor MV Mohlala. Foto: Via Facebook

Die Demokratiese Alliansie gaan ʼn majoor van die Suid-Afrikaanse Nasionale Weermag (SANW) by die Menseregtekommissie (MRK) verkla nadat hy hom glo aan haatspraak skuldig gemaak het ná ʼn aanval op ʼn wit bejaarde leraar en die weermagbestuur hom slegs daaroor oor die vingers getik het.

Johan van Wyk, ds. Braam van Wyk (80) se seun, het op 10 Maart ʼn foto van sy pa se erg aangerande gesig op Facebook gedeel ná ʼn aanval vroeër die dag in Ysterhoutweg in Randparkrif in Randburg.

“Watter lafaards skop ʼn 80-jarige man in sy gesig terwyl sy hande agter sy rug vasgebind is? Hulle het ook sy vriend, afgetrede prof. Kobus Naude wat ʼn wonderlike man was, vermoor deur hom met ʼn mes in sy hart te steek. Hulle het met my pa se wit Mercedes-Benz C220 met die registrasienommer 004 MVW GP op vlug geslaan,” het Van Wyk in sy inskrywing gesê.

Sy plasing is wyd op sosiale media versprei en sowat 20 000 keer op Facebook gedeel.

Maj. M.V. Mohlala, verbonde aan die Wonderboom- militêre basis, het glo in reaksie op Van Wyk se plasing die aanvallers se optrede goedgekeur. Op sy Facebook-profielfoto wat by die inskrywing verskyn het, sit hy in sy weermaguniform met sy naam op ʼn plaatjie op sy bors aangebring.

“Die aanvallers moes sy oë en tong uitgesteek het sodat die laaste gesigte wat hy ooit sou sien, dié van die moordenaars sou wees en hy na sy graf kon gaan met die nagmerrie,” lui die beweerde inskrywing wat sedertdien verwyder is.

Hy het glo ook gesê: “Apartheid is in hom [Braam]. Al hierdie ou wit mense dink ons is onnosel as hulle sê hulle was teen apartheid gekant. Ons sal nie vergeet wat hulle gedoen het nie. Nou is dit die wit mense se beurt.”

Brig.genl. Mafi Mgobozi, die weermag se woordvoerder, het Dinsdag aan Maroela Media gesê Mohlala is reeds verlede week oor die plasing berispe toe dit onder die weermagbestuur se aandag gebring is.

“Hoewel hy die plasing in sy private hoedanigheid gemaak het, is hy tot orde geroep en gewaarsku om nie sulke uitlatings te maak nie, want dit beskadig die weermag se beeld. Hy is gewaarsku om die plasing te verwyder en nie weer sulke uitlatings te maak nie, anders sal tugstappe gedoen word,” het Mgobozi gesê.

Mgobozi het gesê die weermag duld nie sulke optrede nie.

Kobus Marais, DA-LP en woordvoerder vir verdediging en militêre veterane, het Maandag daarteen uitgevaar dat Mohlala slegs oor die vingers getik is en het aangedui Mohlala gaan by die Menseregtekommissie (MRK) verkla word.

“Die DA sal ook ʼn skrywe aan Nosiviwe Mapisa-Nqakula, minister van verdediging en militêre veterane, stuur om haar te versoek om bewerings van haatspraak en rasgebaseerde opsweping tot geweld teen Mohlala te ondersoek,” het Marais gesê.

Marais het gesê daar is geen regverdiging vir sulke “haatlike kommentaar” deur enige Suid-Afrikaner nie. “Gegewe die posisie van maj. Mohlala in die SANW, is sulke opmerkings eenvoudig onaanvaarbaar.”

Volgens Marais is Mohlala se waarskuwing van toekomstige tugstappe nie voldoende optrede deur die weermagbestuur nie.

“Gegewe die ernstigheid van sy oortreding van nierassigheid en respek vir menswaardigheid, moet min. Mapisa-Nqakula dringend die toepaslike dissiplinêre prosesse teen hom instel,” het Marais gesê.

Marais het gesê Mohlala het die voorreg om in die land se gewapende magte te dien. “Sy mandaat is om ons nasie te beskerm, nie om tot die hoë vlakke van misdaad by te voeg of geweld en rassehaat aan te hits nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

86 Kommentare

jongste oudste gewildste
Giel

Daar sal dadels van kom. Die MRK se trawante is sy boeties!!!!

Blommie

Dis nou wat aan die buiteland gestuur moet word, sodat hulle kan sie hoe SA se weermag daar is om die land te beskerm, want die weermag is mos dan kamstig vir almal. maar wys jou wolf bly n wolf al dra hy skaaps klere. dis mos watse tiepe opleiding hulle aan hulle komerade gee. KILL the boer KIL the farmer!!!!!!

Johan

Geagde Majoor … your comments are not in your personal capacity. You, as a officer swore that you will uphold the democracy of this country. Jou uitlatings os verraaf teenoor due land en grondwet en behoort dienooreenkomstig aangekla en in ń militêre verhoor verhoor te word!

Alida

Dank hom onmiddellik af.

White Rhino

Stuur dit asb die buiteland in.