Malema vervolg op vyf afsonderlike aanklagtes

EFF-leier Julius Malema. (Foto: EFF/Twitter)

Die Nasionale Vervolgingsgesag (NVG) het bevestig dat Julius Malema, leier van die EFF, tereg staan op vyf afsonderlike aanklagtes wat verband hou met die afvuur van ʼn vuurwapen tydens ʼn EFF-byeenkoms in 2018.

Malema het vanoggend in die Oos-Londense streekhof verskyn. Volgens ʼn verklaring deur die NVG is die saak tot 24 Februarie volgende jaar uitgestel, sodat die verdediging toegang tot die dossier en beeldmateriaal van die voorval kan verkry.

AfriForum het in Augustus 2018 klagtes teen Malema en Adriaan Snyman, ʼn sekerheidswag, ingedien, nadat Malema na bewering tydens die EFF se vyfjaarfeesvieringe in Mdantsane in die Oos-Kaap verskeie skote met ’n aanvalsgeweer afgevuur het.

Volgens Luxolo Tyali, woordvoerder van die NVG in die Oos-Kaap, kla die NVG Malema van vyf klagtes aan. Die klagtes behels die onwettige besit van ʼn vuurwapen, die onwettige besit van ammunisie, die afvuur van ʼn vuurwapen in ʼn beboude gebiede of openbare plek, versuim om redelike voorsorgmaatreëls te tref om mense en eiendom te beskerm en die roekelose bedreiging van mense en eiendom. Malema verskyn ook in Maart volgende jaar in die hof vir die beweerde aanranding van ‘n lid van die polisie tydens Winne Mandela se begrafnis.

Snyman, die sekerheidswag wat die vuurwapen aan Malema aangegee het voor dit afgevuur is, staan tereg op twee aanklagtes, naamlik versuim om redelike voorsorgmaatreëls te tref om mense en eiendom te beskerm en die verskaf van ʼn vuurwapen of ammunisie aan enige persoon wat nie toegelaat word om dit te besit nie. Snyman is na bewering die eienaar van ’n private sekerheidsmaatskappy wat tydens die voorval dienste gelewer het aan die EFF. In beeldmateriaal van die voorval lyk dit of Snyman die geweer aan Malema oorhandig.

“Dit is goed dat Malema en Snyman uiteindelik sy dag in die hof kry vir hierdie voorval. Ons het reeds gesien dat hierdie beweerde handeling van hom landwyd nagedoen is en die feit dat hy vir so lank nie daarvoor vervolg is nie, het daartoe gelei dat dit as aanvaarbare gedrag beskou word. Dit is betreurenswaardig dat AfriForum eers soveel druk op die NVG moes plaas voordat hulle besluit het om te vervolg, ten spyte van duidelike bewyse van die beweerde oortreding,” sê Ian Cameron, AfriForum se hoof van gemeenskapsveiligheid.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
sdp

Ons tyd op aarde sal al verby wees, dan gaan hofsake nog aan

Michael P

As ek reg onthou was daai n AK 47 waar kom hulle aan die soort wapens? N wetsgehoorsame persoon mag nie eers sy wapen wys nie en Malema vuur een af tussen mense.

Lee

Gaan seker soos al sy hofsake vrygespreek word!

Juju JA JA

Ja wat die ou sal niks oorkom nie, te veel you know what wat hom beskerm MAAR dis vir my lekker om te weet hy word so gepla om kort kort in die hof te moet wees, sy dagboek is seker baie interessant,,,,court…court…court….eish..

Outoppie

Wonder of VBS hom gaan help met petrol geld vir al daai karre wat so tussen howe moet ry