Malema: ‘Wit mense is nie spesiaal nie’

EFF-leier Julius Malema spreek studente by die Esikhawini-kampus van die Umfolozi TVET College naby Richardsbaai toe. (Foto: ANA)

EFF-leier Julius Malema het Maandagaand aan studente in die noorde van KwaZulu-Natal gesê as mense hom ʼn rassis wil noem omdat hy die waarheid praat, moet hulle hom maar so bestempel.

“In die Noord-Kaap en die Wes-Kaap is daar nog steeds mense wat met ʼn bottel wyn betaal word gedurende oesseisoen. Wanneer jy dit sê word jy ʼn rassis genoem. As dit rassisties is om die waarheid te praat, dan is ek trots om ʼn rassis te wees, want ek praat die waarheid,” het Malema gesê.

Malema het ʼn volgepakte saal toegespreek by die Esikhawini-kampus van die Umfolozi TVET College naby Richardsbaai as deel van sy provinsiale verkiesingsveldtog.

Hy het aan die studente gesê die EFF wil hê mense moet trots daarop wees om swart en Afrikane te wees, maar in Suid-Afrika “word wittes steeds behandel asof hulle spesiaal is, terwyl swart mense min selfvertroue het”.

“Daar is niks spesiaal aan wit mense nie. Ons is almal gelyk, ons is almal mense,” het hy gesê. “Die EFF is die enigste party in Suid-Afrika wat nie bang is vir Indiërs of wittes nie, ons sê dit vir hulle reguit in hul gesigte – al tjank hulle of wat ook al hulle doen, hulle sal op die ou end ontspan.”

EFF-leier Julius Malema en EFF-LP Marshall Dlamini, wat van KwaZulu-Natal af kom, spreek studente by die Esikhawini-kampus van die Umfolozi TVET College naby Richardsbaai toe. (Foto: ANA)

Hy het gesê wit mense is nie bang vir die EFF nie, “omdat hulle weet ons sal hulle nie doodmaak of die see in dryf nie. Hulle weet ons bring gelykheid en hulle wil nie gelykheid hê nie.”

Malema het gesê gelykheid sal beteken dat daar in die toekoms wit huishulpe en arbeiders sal wees. “Julle gaan plaaseienaars wees en wit mense aanstel om die trekkers te bestuur,” het hy onder luide applous gesê.

“Dit is my droom. My droom is om ʼn situasie te hê waar swart mense wit mense in diens neem. Dan sal ons gelyk wees.” Hy het later bygevoeg: “Die baas moet enigiemand wees wat ʼn werksgeleentheid kan skep. Dit is moontlik Afrika-kind, moet nie bang wees om te droom nie.”

Malema het ook van die geleentheid gebruik gemaak om na pres. Cyril Ramaphosa en die ANC te kap. Hy het dieselfde vergelyking gebruik wat hy vroeër die dag by ʼn gemeenskapsvergadering gebruik het, en gesê Ramaphosa en oudpres. Jacob Zuma is soos “om vleis in dieselfde pot te kook”.

“Jy kan nie vleis wat in dieselfde pot gekook is uitvat en sê die een is goed, maar hierdie een is nie,” het hy gesê.

Hy het gesê die EFF soek “regte gratis tersiêre onderrig” waar student nie registrasiefooie of BTW op handboeke hoef te betaal nie. “’n Nasie wat nie lees nie, is ʼn nasie van zombies. Inligting word versteek in boeke,” het hy gesê.

Malema het aan die studente gesê daar is niks mee fout om kospakkies by die ANC te ontvang of ʼn saamgerygeleentheid na die kiesstasies by die ANC te kry en dat op verkiesingsdag vir die EFF te stem nie. “Hulle kom gee vir julle kospakkies asof julle net een keer elke vyf jaar eet. Moenie nee sê vir die kospakkie nie. Vat dit, kyk na die vervaldatum en gaan stem dan EFF. Hulle koop daardie kos met jou belastinggeld. Hulle gaan op 8 Mei kom en julle in kombi’s oplaai. Klim in hulle kombi en gaan stem EFF,” het hy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

85 Kommentare

jongste oudste gewildste
KaterinaKat

Jaaa Julius..so spesiaal word witmense behandel dat ons skaars werk kan kry. Dat ons kinders die land moet verlaat om n werk te kan he..Ek wens ons het regtig daardie heerlike maklike droomlewens gehad wat jy vir een of ander weird rede glo ons het. Sou lekker wees.

Kriek

Ag my jitte, Julius word tog wakker. Ek woon op die platteland en ken talle wit plaaswerkers op swart mense se plase. Mense wil net werk hê. Hoekom die alewige haatspraak teen minderhede?

Boerboel

Ons moet werk om iets te kan verdien, ons breek nie af en dan kry ons . So is hy dink ons is spesiaal baie dankie. Julius jy lewe in n’ droom wereld en sal nog hard aarde toe kom. Die man daarbo slaap nie! Kom probeer my in die see in jaag.

Steven de Lange

Julius, ek sal nie mind om op n plaas die trekker te ry nie, want dan sal die werk gedoen kom en die trekker sal mooi opgepas bly. So natuurlik gaan swartes wittes moet aanstel want wie anders kan en gaan die werk kan doen sonder om alles te wil verwoes. En net soos jy wil hê swartes moet trots wees om swart te wees, waarom nie ek ook nie. Ek is wit en trots. En n boer. So as dit my rassisties maak om so te sê, dan is ek gewis n trotse wit rassis

Hector Jooste

Om die “baas” te kan wees Julius, het nog nooit in SA enige iets met kleur te maak gehad nie. Jy moet nie bang wees vir werk nie! En dit is jou grootste probleem, en almal wat vir jou hande klap. Jy is ‘n praatjies-maker wat nog nooit een dag se eerlike werk in jou lewe gedoen het nie. Jy en almal wat na jou luister moet eers by daardie hekkie verby kom, dan kan julle dalk ook eendag “base” wees.