Man (81) sterf 3 weke ná gru-plaasaanval

Athol en Colleen Harvey. Foto: Verskaf.

Athol Harvey, die 81-jarige man wat op 13 Februarie vanjaar op die plaas Weltevrede naby Kimberley in die Noord-Kaap saam met sy vrou, Colleen Harvey (78), aangeval is, is Maandagaand dood.

Suzanne von Maltitz, die egpaar se dogter, het die nuus aan Maroela Media bevestig.

Volgens Von Maltitz is Athol Maandagaand dood terwyl hy en Colleen televisie gekyk het. “Hy het net sy oë toegemaak en sy laaste asem uitgeblaas.”

Athol is eers Vrydag uit die Mediclinic Gariep in Kimberley ontslaan waar hy behandel is ná die aanval.

Die egpaar is net meer as drie weke gelede in hul huis oorval terwyl hulle geslaap het. “Hulle het wakker geword met die drie aanvallers letterlik bo-op hulle. Hulle het my pa dadelik bewusteloos geslaan met ʼn kort, dik ysterstaaf,” het Von Maltitz gesê.

Athol is ook herhaaldelik geskop en Colleen met ʼn mes aangehou en vasgebind. Sy het snywonde aan haar hande en bene opgedoen soos sy baklei het.

Von Maltitz vertel haar ma het die vorige aand iemand by die venster gehoor en regop in die bed gesit en gevra “wat soek julle?” omdat hulle gedink het dis van die plaaswerkers.

“Ons besef nou dit was die aanvallers, hulle het die vorige dag al kom kyk en sou nie afgesit word nie.”

Athol het erge kopbeserings tydens die aanval opgedoen – sy skedel was gebreek. “Hy het die eerste ruk net in die hospitaalbed gelê, sy kop vasgehou en gesê hoe verskriklik seer dit is,” het Von Maltitz vertel.

Van links is Bronwyn Field, Matthew Field, Michelle Field, nog een van die egpaar se dogters, Suzanne, Athol, Colleen en Alistair Field in die hospitaal op sy 81ste verjaarsdag. Foto: Verskaf.

Die dokters het glo destyds aan hulle gesê die egpaar sou nie eens die aanval oorleef het as dit nie was dat hulle nog so gesond was en aktief geboer het nie. Hul nabye familie het saam met Athol sy 81ste verjaarsdag in die hospitaal deurgebring.

Von Maltitz vertel die familie is baie gefrustreerd met die polisie se hantering van die saak. Hulle het volgens haar agt dae ná die aanval eers by die huis aangekom om met die werkers onderhoude te voer.

“Ek het vir my werkers gesê ek gaan poligraaftoetse laat doen om te kyk of hulle iets weet. Hulle het net gesê ‘bring die mense, hulle moet kom’. Ek glo regtig nie dit was een van hulle nie. Hulle is nét so hartseer oor my pa en hulle is nét so bang op daardie plaas. Die voorman het vir my gesê, ‘Pa was altyd so ʼn goeie man, hy het altyd na ons probleme geluister’. My pa het dit regtig nie verdien nie.”

Die gesin moes destyds uit Zimbabwe trek toe die Mugabe-regime wit boere van hul plase begin verjaag het. “[My ouers] het hier kom oorbegin met niks en die plaas opgebou tot waar hy nou is. Ek wil hê die wêreld moet weet watter aaklige plek dit dié is om in te woon. Niemand gee om oor ons nie en dit lyk nie of dinge gaan verbeter nie.”

Von Maltitz sê sy is self permanent gewapen en haar pa het met ʼn pistool onder sy kussing geslaap.

Kapt. Sergio Kock, woordvoerder van die polisie, het aan Maroela Media gesê ʼn saak van moord word nou by die ondersoek gevoeg.

Niemand is nog in verband met die voorval in hegtenis geneem nie.

Die familie sal Vrydag ʼn privaat gedenkdiens op Weltevrede hou. “Ons wil net stil in die natuur saam met hom wees.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Marianne

Rus in vrede my liewe oom, in 81 jaar het hy meer deurgemaak as baie ander. Jy het hierdie aanval nie verdien nie, jy het nie verdien om SO te sterf nie!
Tannie die Here slaap nie, Hy het jou vir iets groter gespaar. Sy liefde en genade sal jou en jul kindersven familie dra.

Jammer

Daar is absoluut GEEN sin aan die plaasmoorde nie, en die regering en meeste lede van die publiek en massas het geen simpatie nie, inteendeel, hulle rejoice elke plaasaanval, net omdat hulle nie weet dit gaan hier oor DISRESPEK vir alle lewe, nie net die van wittes nie. EK is so jammer vir die oom se familie. Hulle het niks verkeerds gedoen nie, en as dit net huisroof was, kon hulle twee oumense vasbind, NIE SO VERNIEL NIE!! ..

Willie

EK hoop n Polisie hoof lees die en vat aksie… O nee hulle is dalk ook te korrup en lui.. Dis regtig teleurstellend om te hoor die polisie vat 8 dae… SIES! Rus in vrede Oom, niemand vedien om so deur lafaards vermoor te word nie! Die Here slaap nie! Tanie alle sterkte en die Here jou dra in die moeilikke tyd… Aan Malema- Jy het bloed op jou hande!

Pieter

So word die volk uitgemoor en die ” polisie ” meer useless by die dag maar ons aanvaar dit maar want ons aanvaar alles .

Theresa

Jy is heeltemal reg.