Man breindood ná gru-aanval in kroeg

Ludi Vink. Foto: Facebook

Ludi Vink. Foto: Facebook

Die polisie ondersoek ʼn saak van moord nadat ʼn 30-jarige man breindood verklaar is nadat hy Dinsdagaand in ʼn kroeg in Alberton met ʼn potspelstok in die oog gesteek is.

Ludi Vink was Dinsdagaand by die kroeg in Randhart toe die voorval gebeur het. Kapt. Mavela Masondo, woordvoerder van die polisie, het bevestig Vink is “met ʼn onbekende voorwerp” gesteek en na ʼn hospitaal gehaas. Hy is daar breindood verklaar en is vroeg Donderdagoggend dood.

Masondo het ook bevestig die polisie is bewus van beeldmateriaal van die voorval. Dit vorm deel van die ondersoek. Die grusame beeldmateriaal, wat intussen op YouTube gedeel is, toon hoe Vink langs die potspeltafel in die kroeg staan. ʼn Man in ʼn kraaghemp gryp dan die potspelstok en steek Vink in die gesig, voordat hy omdraai en uit die kameraskoot beweeg.

Iemand hardloop dan nader en trek die stok uit Vink se gesig voordat hy hulp ontbied.

'n Skermskoot uit die video van die aanval.

‘n Skermskoot uit die video van die aanval.

Masondo wou nie bewerings dat die verdagte ʼn bekende skuldinvorderaar in Alberton is bevestig nie en het gesê die polisie kan nie nou meer inligting oor die ondersoek bekend maak nie. Hy het ook berigte, dat ʼn verdagte hom in verband met die voorval aan die polisie oorgegee het, ontken. “Niemand is nog in hegtenis geneem nie.”

Alberton Rekord berig Vink is lank genoeg op lewensondersteuningsmasjiene gehou om sy organe te skenk.

Vink se gebroke ma, Danlee Vink, het vandag op Facebook hulde aan haar seun gebring. “Vandag het ek, al was jy al klaar weg, my laaste totsiens gesê,” het sy geskryf. “My hart is uitgeruk, my siel is in pyn. My liewe, mooie, vriendelike seun. So sinneloos en wreed van my af weggeruk. Elke deeltjie van my is in pyn. Ek is lief vir jou my seun.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Kees

Vertel asb op sosiale media wie daardie wreedaard is dat ons almal weet…

Waarom?

Waarom? Ja, waarom so ‘n lafhartige en agterbakse daad? Jy wat dit gedoen het verdien nie om met jou pote op hierdie aardbol rond te beweeg!!
Hy is met ‘n “onbekende voorwerp gesteek”? Duidelik is die voorwerp te siene.
Sterkte aan die moeder, familie en vriende.

Alida

Ai dit is tragies. Sterkte mevrou. Indien die skurk n invorderaar was besef hy duidelik nie dat die wet op skuldinvordering al jare gelede verander het nie. Sulke barbaarse en platvloerse gedrag word lankal nie meer toegelaat nie.

Dirk

Daai lafhartige boef gaan gevang word. Hy sal lekker in die tronk potspel speel…. Hy gaan nie so maklik kan weg loop van daai speletjies nie.

Mel

Ek dink hy gaan letterlik en figuurlik “voel” hoe word daar potspel gespeel, sluk maar ‘n vurk in my ou. Sterkte aan Ludi se moeder, geregtigheid sal seevier