Man deur aanvallers in polisiesel doodgeskiet

Argieffoto

ʼn 38-jarige man wat in aanhouding by die Ngangezwe-polisiestasie in Mthatha in die Oos-Kaap was, is deur vier mans met klapmusse vermoor toe dié stasie in die vroeë oggendure aangeval is.

Dié man sou vandag in die Ngcobo-landdroshof verskyn het.

Kol. Brenda Muridili, woordvoerder van die polisie, het gesê daar word beweer dat vier gewapende mans die polisiestasie net ná middernag binnegegaan het en die beamptes aan diens met vuurwapens aangehou het.

“Twee boosdoeners het na die aanhoudingselle beweeg en beamptes het verskeie geweerskote gehoor. Die verdagtes het daarna almal van die toneel gevlug,” het Muridili gesê.

Die man is ná die aanval dood in die sel aangetref.

Niks is tydens die voorval gesteel nie.

Genl. Khehla Sitole, nasionale polisiekommissaris, het opdrag gegee dat die 72-uur-aksieplan in werking gestel word om die oortreders vas te trek.

Die man wat deur die aanvallers doodgeskiet is, is op 29 Julie in hegtenis geneem vir die onwettige besit van vuurwapens.

“Die multidissiplinêre span wat geaktiveer is, sal die motief vir die moord ondersoek.”

Sitole het bygevoeg dat die veiligheid van beamptes en mense wat by polisiestasies aangehou word een van die hoogste prioriteite is.

ʼn Saak van moord word ondersoek.

Die aanval volg sowat ses maande ná die Ngcobo-polisiemoordtog in Februarie skokgolwe deur die land gestuur het. Gewapende rowers het die Ngcobo-polisiestasie tussen Mthatha en Queenstown bestorm en beroof. AO Zuko Mbini (45), konst. Zuku Ntsheku (38), konst. Nkosiphendule Pongco (32), konst. Sibongiseni Sodlana (32) en konst. Kuhle Metete (27) is tydens die rooftog doodgeskiet. Freddy Mpandeni (58), ʼn afgetrede soldaat van die Suid-Afrikaanse Weermag, is ook doodgeskiet toe die verdagtes van die toneel gevlug het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

22 Kommentare

jongste oudste gewildste
Lientjie

Duidelik het die ou in die selle te veel geweet.

Theresa B

Net so Lientjie. Gou-gou stilmaak voor hy in die Hof verskyn. Niemand moet weet waar al die vuurwapens vandaan kom nie.

Nettie

Iemand is permanent stilgemaak ……………………..

Hulle het seker geweet die polisie-beamptes aan diens slaap alreeds na 00:00 en het die aanval vir net ná middernag beplan. Dis ‘n wonder geeneen van die polisiebeamptes se vuurwapens is geroof nie ……..

Skerpioen

Ja nee, in Suid-Afrika is mens nerens meer veilig nie.

Hansie Slim

Miskien moet hulle maar vir die SAPD kantore buurtwag of sekuriteit maatskappye aanstel…?