ʼn Man is Maandagoggend dood aangetref in ʼn swembad by ʼn vakansieoord naby Kimberley in die Noord-Kaap.
“Die polisie doen ʼn geregtelike doodsondersoek na die afsterwe van Andile Mbala (25),” het lt. Andrea Cloete, woordvoerder van die polisie, gesê. “Sy liggaam is omstreeks 08:00 op die bodem van die swembad aangetref by die Riverton-plesieroord.”
Mbala het in Bloemanda, Galeshewe, gewoon. ʼn Nadoodse ondersoek sal die oorsaak van sy dood bepaal.