Man dood toe trein bakkie tref

Die wrak van die Ford Ranger. (Foto: Verskaf)

’n Man (45) van Bloemfontein is Sondagmiddag dood toe ’n aankomende lokomotief sy bakkie op ’n spoorwegoorgang naby die stad getref het.

Die voorval het omstreeks 15:10 by die Marius-spooroorgang op Ferreira plaasgevind.

Brig. Motantsi Makhele, woordvoerder van die polisie, sê die drywer van die lokomotief was met goedere van Springfontein na Bloemfontein onderweg toe hy ’n wit Ford Ranger die spooroorgang van die regterkant teen ’n hoë spoed sien nader het.

Volgens Makhele het die drywer van die lokomotief getoet om die bestuurder van die bakkie te waarsku dat hy ʼn oorgang nader. Die bakkie het egter nie by die oorgang gestop nie en die lokomotief het die voertuig aan die linkerkant getref en sowat 50 meter verder gesleep.

Die bestuurder van die bakkie is op slag dood.

Jaco Kaalsen, paramedikus by Med24/7 in Bloemfontein, sê paramedici het met hul aankoms op die toneel die bakkie langs die treinspoor aangetref. Die lokomotief het nie ver daarvandaan tot stilstand gekom nie.

Die plaaslike brandweer en reddingsdienste moes meganiese toerusting gebruik om die bestuurder van die bakkie uit die wrak te bevry voordat die toneel aan die polisie oorgegee is vir verdere ondersoek.

Makhele sê ’n saak van strafbare manslag word ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

11 Kommentare

Prontuit ·

ai hoe tragies mense besef nie ‘n trok en ‘n trein kan nie soos ‘n voortuig net dadelik doodstop nie sterkte aan die familie maar ook die trein drywer! om met so iets saam te leef sjhoe kan my nie indink nie, want jy weet al rem jy ook hoe hard dit gaan nie ‘n verskil maak nie

Frik ·

Ek hoor jou, maar ek dink dit is redelik standaard praktyk in gevalle soos hierdie. Burokrasie is ‘n lekker ding, is dit nie?

Toy ·

Rus sag Gerrie. Simpatie aan sy gesin en familie. Baie sterkte vir julle in hierdie hartseer tyd.

007 ·

Hoop regtig nie die SAPD kla die treindrywer aan nie. Ek weet hy kon betyds gestop het met n 300000 ton trein of uitgeswaai het en die bakkie gemis het. Sterkte aan Gerrie se familie RIV.

Patch ·

Jy weet hy kon betyds gestop het met ‘n 300000 ton trein of uitgeswaai het en die bakkie gemis het…. ek verstaan jou sin nie so mooi nie. Hoe swaai ‘n trein uit of stop so swaar trein betyds? Die bakkie sou betyds kon stop as hy nie teen ‘n hoë spoed gery het en gestop het soos dit gedoen moet word by ‘n trein oorgang nie. Wou moontlik nie staan en wag vir die trein om verby te gaan nie en het probeer oor ry. Innige meegevoel met die familie, maar kry treindrywer bitter jammer om hiermee saam te leef. Beslis nie die treindrywer se skuld nie.

Peetjie ·

Dis sinneloos om die trein drywer vir strafbare manslag aan te gee/hou… Jy stop nie n trein soos n kar nie.. Weereens het iemand nie mooi gedink nie en met sy lewe geboet. Maar tog – sterkte vir sy gesin en familie

Belinda ·

Miskien het die persoon n doodswens gehad? Die trein het hom waarskuwings gegee. Mense besef nie hoe vinnig n trein eintlik is nie en kan defnitief nie vinnig tot stilstand kom soos n voertuig nie… Mense leer nie, jy speel nie by trein oorgange nie. Stop en kyk eerder, dis deur kanse vat wat sulke dinge gebeur.

anniekiewiet ·

Ek ken daardie treinoorgang so goed en het al hoeveel ongelukke daar gesien omdat die bestuurder óf nie die gevaar insien nie, óf wil wys hoe oulik en vinnig hy is. Ek wonder hoeveel mense is oor die jare al daar beseer en dood.

Andries ·

Baklei met ‘n trein en jy sal altyd die onderspit delf.

Maggies ·

My simpatie aan die oorledenes se familie. My hart bloei egter vir die treindrywer asook sy familie. Dit moet vreeslik wees om nou in ‘n strafbare manslag ondersoek betrokke te wees. Ek is seker dat hy alles in sy vermoë gedoen het om die ongeluk te vermy. Mag sy onskuld bewys word.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.