Man doodgeskiet tydens JHB-betoging

Veiligheidswagte het Maandagoggend ʼn man doodgeskiet tydens ʼn betoging by die Newclare-treinstasie naby Westbury in Johannesburg.

“Inwoners van die Kathrada Park-informele nedersetting het na die treinstasie opgeruk en kantore aan die brand gesteek en vensters gebreek,” het ao. Jerbes de Bruyn, woordvoerder van die polisie, gesê. “Veiligheidswagte by die treinstasie het een van die betogers doodgeskiet.”

Hulle betoog glo oor behuisingskwessies. De Bruyn het gesê die man se naam en ouderdom moet nog vasgestel word.

“Die polisie het die veiligheidsbeamptes van die perseel verwyder en na ʼn veilige plek geneem.” Volgens De Bruyn het die polisie die betogers met rubberkoeëls uit mekaar gejaag, maar hulle het kort daarna weer begin betoog.