Argieffoto (Foto: Gerd Altmann/Pixabay)
Marius Smit (27) is vandeesweek in die Bloemfonteinse streekhof skuldig bevind en gevonnis op aanklag van bedrog.
“Dit spruit uit ʼn voorval wat op 3 Julie 2019 plaasgevind het toe die Valke in Bloemfontein inligting ontvang het oor valse advertensies op Facebook waar voertuie te koop aangebied word,” het kapt. Christopher Singo, woordvoerder van die direktoraat vir prioriteitsmisdaadondersoeke (die Valke), gesê.
Smit het deposito’s geëis van voornemende kopers vir petrolgeld of ʼn fooi om die voertuig af te lewer. “Die slagoffers het die geld dan deur middel van ewallet of geldmarkooplasings aan hom oorbetaal. Smit sou dan die geld onttrek en nooit die voertuie aflewer soos ooreengekom nie.”
Die Valke het ondersoek ingestel en Smit is in Botshabelo opgespoor en in hegtenis geneem toe hy kontant by ʼn kitsbank onttrek het. Hy het ʼn paar keer in die hof verskyn voor hy skuldig bevind is.
Die hof het hom tot drie jaar direkte tronkstraf gevonnis.
As hy uitkom gaan hy maar net voort
Eerder vort as voort.
Ek vermoed dis ook die uitvaagsel wat ‘n container aan my goedgelowige man verkoop het sowat 8 jaar gelede. Die gaafste jongman wat jy jou kan voorstel. Vriendelik en innemend. En net mooi beloftes. Ons wag vandag nog vir die container wat net nooit opgedaag het nie.
Hy het nou drie jaar in die tjoekie om sy talent te verfyn.
Jakkals verander van hare maar nooit van sy streke nie.
Ek dink daar is meer as net een persoon wat so skelm is op facebook.
Ek betaal COD – as ek nie die goods met my eie oe sien ens nie, kry jy nie n sent nie. Mens kry maar n paar naiewe (jammer vir spelling) mense wat natuurlik glo wit mense is nie skelm nie….