Man gevonnis vir aanval op bejaarde egpaar

hof-hamer

Argieffoto.

ʼn 29-jarige man is gevonnis vir sy aandeel in die aanval op ʼn bejaarde egpaar in 2014.

Kapt. Gerda Swart, woordvoerder van die polisie, het gesê Sipho Mayinje is Donderdag in die Port Elizabeth-streekhof gevonnis vir die aanval op 30 Oktober 2014. Die bejaarde egpaar, albei in hul 70’s, is in hul huis in Addo in die Oos-Kaap aangeval. Hulle is vasgebind en beroof.

Volgens Swart is drie mans op 1 November 2014 in Motherwell in hegtenis geneem in verband met die voorval. Die voertuig wat tydens die aanval gesteel is, is ook kort hierna teruggevind. Mayinje is die enigste beskuldigde wat gevonnis is in verband met die voorval aangesien een van die ander beskuldigdes in die tronk dood is voor hy gevonnis kon word en die ander beskuldigde nie positief met die misdaad verbind kon word nie en vrygelaat is.

Mayinje is tot sewe jaar tronkstraf gevonnis vir huisbraak met die bedoeling om te roof, sewe jaar tronkstraf vir huisroof en 15 jaar tronkstraf vir ontvoering. Volgens Swart hou die ontvoeringsklag verband met die egpaar wat vasgebind is. Mayinje sal effektief 29 jaar tronkstraf uitdien.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

2 Kommentare

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.