ʼn Werker by die Triomf Primêre Skool het aan Maroela Media gesê ʼn opsigter by die skool het vroeg Dinsdagoggend die gru-ontdekking gemaak. Volgens die werker was die oorledene nie ʼn onderwyser of iemand wat aan die skool bekend was nie. Die werker het ook gesê die toneel is afgesper voor enige van die skool se kinders dit kon sien.
Kapt. Johan Rheeder, woordvoerder van die polisie, het bevestig dat ʼn 25-jarige man by die skool selfmoord gepleeg het. Volgens Rheeder sal daar nie ʼn geregtelike doodsondersoek geopen word nie aangesien daar klaar vasgestel is die persoon het selfmoord gepleeg.
AlgoaFM berig intussen die man het hom in ʼn gr. 4-klaskamer opgehang en dat daar ʼn selfmoordbrief agtergelaat is. Die skool het intussen vir die dag gesluit en al sy leerders huis toe gestuur.