Die saak teen ʼn man wat daarvan beskuldig word dat hy ʼn vrou en haar vyf kinders vermoor het in KwaZulu-Natal, is Maandag in die hooggeregshof in Durban uitgestel.
Natasha Ramkisson-Kara, woordvoerder van die Nasionale Vervolgingesag (NVG), het gesê die saak teen Tshepang Mokhali (25) is tot 30 Oktober uitgestel sodat sy regspan ʼn sielkundige verslag kan bekom.
Regter Nompumelelo Radebe het verlede maand gelas dat Mokhali ʼn dokter moet gaan sien en dat daar ʼn mediese verslag aan haar oorhandig moet word.
Mokhali word daarvan beskuldig dat hy Maselina Leneah (38) en haar vyf kinders, tussen drie en 14 jaar oud, in Desember 2012 doodgeskiet het. Hulle was glo familie van hom. Leneah het ʼn snoepwinkel bedryf en Mokhali het haar glo beroof voor die moorde.
Mokhali het na die moorde glo na Lesotho gevlug en is in hegtenis geneem nadat hy ʼn familielid in Matatiele in die Oos-Kaap besoek het.