Man in hof ná hy ma glo wreedaardig vermoor

Argieffoto

ʼn 28-jarige man het Woensdag in die Coligny-landdroshof in Noordwes verskyn nadat hy glo sy bejaarde ma in die Tlhabologang-nedersetting by Coligny vermoor het.

Kol. Adéle Myburgh, woordvoerder van die polisie, sê Butinyana Joseph Khuabo is Maandag in hegtenis geneem.

“Volgens die inligting tot ons beskikking het hy en sy ma, Atalina Maria Khuabo (73), glo ʼn woordewisseling gehad voordat hy haar wreedaardig aangerand het.”

Die ma was in die slaapkamer toe haar seun haar na bewering twee keer met ʼn byl in die nek gekap het.

ʼn Familielid wat net ná die voorval by die huis opgedaag het, het die polisie en nooddienste ontbied. Die ma is op die toneel dood verklaar.

Khuabo sal in aanhouding bly tot sy volgende hofverskyning op 21 September.

In ʼn afsonderlike voorval in Jouberton in Noordwes is ʼn 31-jarige ma Dinsdag vasgetrek nadat sy glo haar twee dogters, onderskeidelik drie jaar en 21 maande oud, vermoor het.

Ná die kinders vanjaar op 5 Augustus oorlede is, is hul liggame vir ʼn nadoodse ondersoek gestuur, wat bevestig het dat hulle vergiftig is. Die ma is daarna in hegtenis geneem in verband met hul dood.

“Die ma het aanvanklik beweer dat sy die kinders na ʼn plaaslike hospitaal geneem het nadat hulle siek geword het. Albei is met aankoms by die hospitaal dood verklaar.”

Weens die nadoodse ondersoek se uitslag is die aanvanklike geregtelike doodsondersoek verander na twee aanklagte van moord.

“Die ma is ondervra en sy het erken dat sy haar kinders vergiftig het.”

Sy sal na verwagting Donderdag vir die eerste keer in die landdroshof in Klerksdorp op twee aanklagte van moord verskyn.

Lt.genl. Sello Kwena, die provinsiale polisiekommissaris in Noordwes, het ʼn beroep op mense gedoen om vroue en kinders te beskerm. Hy het ook gesê dat vreedsame oplossings vir konflik bereik moet word, eerder as om tot geweld oor te gaan.