Man in hof oor Top Billing-aanbieder se dood

ʼn Man het Vrydag in die Randburg-landdroshof verskyn in verband met die ongeluk waarin die Top Billing-aanbieder Simba Mhere dood is.

Preshalin Naidoo, die bestuurder van die ander motor wat in die botsing betrokke was, het vlugtig in die hof verskyn. Hy word van strafbare manslag en roekelose of nalatige bestuur aangekla. Die saak is tot 23 Julie uitgestel.

Naidoo se motor het op 31 Januarie in Johannesburg teen Mhere s`n gebots. Naidoo het na bewering die William Nicol-afrit gevat, waarna hy glo oor die middeleiland gery en teen Mhere se motor gebots het.

Mhere en sy passasier, Kady-Shay O’Brian, is op die toneel dood verklaar. Mhere se pa, wat ook in die motor was, het geringe beserings opgedoen.