Kyle van Reenen, woordvoerder van Crisis Medical, het gesê die 32-jarige man het kort ná middernag van ʼn balkon op die tweede verdieping geval. Die man het deur ʼn dakvenster geval en daarna op die balkon van ʼn restaurant beland.
“Hy was in ʼn kritieke toestand. Hy is eers op die toneel gestabiliseer waarna hy op ʼn spesiale draagbaar geplaas is. Die man het vermoedelik rugbeserings opgedoen en is na ʼn nabygeleë hospitaal geneem vir verdere behandeling.”
Volgens Van Reenen is niemand anders tydens die voorval beseer nie. Dit is nog nie duidelik wat veroorsaak het dat die man geval het nie.