Die Nasionale Seereddingsinstituut (NSRI) is Maandag na die Twee Oseane-akwarium in Kaapstad ontbied nadat ʼn 63-jarige man van Johannesburg ʼn hartaanval in ʼn watertenk gehad het.
“Reddingswemmers van die NSRI Tafelbaai is deur ER24-paramedici ontbied,” het Craig Lambinon, woordvoerder van die NSRI, in ʼn verklaring gesê.
Die man was glo besig met ʼn avontuurduik in die watertenk toe hy in die moeilikheid beland het. Hy het vermoedelik ʼn hartaanval gehad.
ER24-paramedici het bevestig dat die man reeds deur ʼn duiker van die akwarium uit die water gehaal is voor hulle by die toneel opgedaag het. Hy is in ʼn ernstige toestand na die hospitaal gehaas.