Brig. Sally de Beer, woordvoerder van die polisie, het gesê die finansiesgebou op die kampus is Dinsdagoggend vroeg aan die brand gesteek. Die polisie was vinnig op die toneel. “ʼn Verdagte is ingeneem vir ondervraging en ons probeer nog vasstel of hy aan die voorval verbind kan word.”
De Beer het gesê die verdagte is nog nie aangekla of amptelik in hegtenis geneem nie. Volgens die universiteit is die man met kringtelevisiebeeldmateriaal in die omgewing geïdentifiseer.
Lesiba Seshoka, woordvoerder van die universiteit, het gesê die akademiese program word nie deur die voorval geraak nie. “Die brand was in ʼn kantoor in die finansiesgebou en het skade aangerig aan toerusting en dokumentasie.”
Polisiebeamptes van die Alexandra-polisiestasie is Dinsdag op die kampus ontplooi.