Shaun Oosthuizen (38) het skuldig gepleit op aanklagte van moord en roof met verswarende omstandighede.
Maroela Media het vroeër berig Potgieter se liggaam is op 9 Julie 2018 in haar selfsorgeenheid by die Macadamia-versorgingsoord in Mbombela gevind. Haar hande was vasgebind en daar was ʼn voorwerp om haar nek gebind. ʼn Personeellid van die versorgingsoord het haar liggaam in die badkamer aangetref.
Volgens Monica Nyuswa, woordvoerder van die Nasionale Vervolgingsgesag (NVG) in Mpumalanga, het Oosthuizen die dag van Gauteng na die versorgingseenheid in Mbombela gereis. Hy het die versorgingseenheid betree en na die eenheid gegaan waar Potgieter gewoon het.
“Potgieter se deur was oop en hy het binnegegaan. Hy het haar aangerand, vasgebind en verwurg. Sy is op slag dood,” bevestig Nyuswa.
Oosthuizen het Potgieter verder van ’n bedrag van R10 000 beroof en van die toneel gevlug. Sy het die geld by haar gehad om haar maandelikse betalings te doen.
Oosthuizen is saam met John du Plooy (26) en Maryna Mandy Vorster (48) vyf dae ná Potgieter se moord in Krugersdorp in hegtenis geneem. Die klagtes teen Du Plooy en Vorster is intussen teruggetrek weens onvoldoende bewyse teen hulle.
Advokaat Vuyo Mkhulisi het aan die hof gesê dat Oosthuizen skuld beken het vanweë die oorweldigende getuienis wat die staat teen hom het. Beeldmateriaal van kringtelevisies wys duidelik hoe Oosthuizen by die oord uit sy voertuig klim, later weer terugkeer en wegry.
Mkhulisi het aan die hof gesê Oosthuizen het ook ’n lys van vorige oortredings teen hom. Dit sluit talle misdrywe teen bejaardes en kwesbare slagoffers in. Volgens Nyuswa sal hierdie oortredings in gedagte gehou word wanneer ʼn vonnis opgelê word.
Mkhulisi het geargumenteer dat die hof nie van die voorgeskrewe minimum vonnisse moet afwyk nie.
Regter Johnna Mthimunye het die vonnisverrigtinge tot Donderdag uitgestel.
Maksimum x 2.Vorige veroordelings maar hy loop vry rond?
Hoekom was hy vrygelaat…sy kon nog geleef het.
Kan iemand verduidelik