ʼn 32-jarige man se arm is Dinsdag geamputeer nadat dit in ʼn voerband by ʼn bemesting- en komposfabriek in Cato Ridge in KwaZulu-Natal beland het.
“Die voerband het reeds die man se arm geamputeer toe paramedici by die toneel opgedaag het,” het Pieter Rossouw, woordvoerder van ER24, in ʼn verklaring gesê. “Hy het ook erge weefselskade aan sy skouer opgedoen.”
Die man is na Hillcrest privaat hospitaal geneem vir verdere behandeling. Hy is in ʼn kritieke, maar stabiele toestand.
Die oorsaak van die ongeluk is nog nie bekend nie.