Man skiet rower tydens verkeerslig-rooftog

Argieffoto

ʼn Motoris het ‘n man laat Donderdagmiddag in die boud geskiet toe hy en twee makkers by ʼn verkeerslig in Pretoria op hom toegeslaan het.

Kapt. Daniel Mavimbela, woordvoerder van die polisie, het gesê die verdagte word onder polisiebewaking in ʼn plaaslike hospitaal behandel.

“Die man het by ʼn verkeerslig in Steve Biko-weg stilgehou toe drie mans op hom toegesak en hom met ʼn mes gedreig het. Hulle het al sy waardevolle items geëis. Een van die verdagtes het in die voertuig ingeleun en die motor afgeskakel,” het Mavimbela gesê.

Die man kon daarin slaag om sy vuurwapen te bereik en het op die verdagtes begin skiet. “Een van die verdagtes is in die boud geskiet,” het Mavimbela gesê. Die verdagtes het die slagoffer glo van sy selfoon beroof voordat hulle van die toneel gevlug het.

Die polisie kon daarin slaag om die gewonde verdagte ʼn paar blokke van waar die voorval plaasgevind het vas te trek. Daar is beslag gelê op die mes. “Hy is gestabiliseer en na ʼn nabygeleë hospitaal geneem vir verdere behandeling,” het Mavimbela gesê.

Die verdagte sal binnekort in die Pretoria-landdroshof verskyn op aanklagte van roof en die besit van ʼn gevaarlike wapen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
Toi Toi

Gaan die man nou in die moeilikheid kom omdat hul n mes gehad het toe skiet hy hul……

Johan

Geen poging tot moord aanklag nie? Seker nie ‘n witman gewees wat geskiet het nie…

Gerda Erasmus

Welgedaan Mnr! Ons moet permanent op ons hoede wees vir sulke skelms om ons!

Afrikaanse Knaap

Niemand het die rower as kind op die boud geslaan en vir hom gesê: “Dis verkeerd” nie.
Nou kry die slagowwer ‘n koeël in die boud.
Hoop hy het sy les geleer.

Penellope Jones

Nou gaan die motoris seker aangekla word. . . . . . .