Man skuldig aan moord op boer

ʼn Tweede verdagte is in die hooggeregshof in Pietermaritzburg skuldig bevind aan die moord op Micky Hampson (68).

Jabulani Ngobese (28) is ook skuldig bevind aan poging tot moord op Hampson se seun, Murray (34). Ngobese het onskuldig gepleit op die aanklagte teen hom. Sy medebeskuldigde Siboniso Mtolo (25) het egter sy aandeel in die misdaad erken en is vroeër die maand tot lewenslange tronkstraf gevonnis.

Hampson, van die plaas Eston naby Mid-Illovo, en sy seun is op 27 September 2013 deur twee verdagtes aangeval terwyl hulle in Hampson se bakkie gery het. Hampson is geskiet en is op slag dood. Die verdagtes het Hampson glo met sy eie haelgeweer geskiet voor hulle daarmee gevlug het.