Man slaan glo vriendin dood, pleeg selfmoord

‘n Man het glo sy vriendin doodgemaak voor hy later homself doodgeskiet het naby Marikana in Noordwes.

Kol. Sabata Mokgwabone, woordvoerder van die polisie, sê die man het glo vroeg Saterdagoggend sy vriendin met ‘n ysterstaaf doodgeslaan in die Nkaneng informele nedersetting. Die vrou is dood aangetref in een van die plakkershutte.

“Die saak is by die polisie aangemeld waarna hulle na die toneel is. Die polisie het met behulp van die gemeenskap ‘n soektog na die man van stapel gestuur nadat daar verneem is dat hy in die area wegkruip,” het Mokgwabone gesê.

“Die verdagte het homself doodgeskiet toe die polisie by die plakkershut opgedaag het waar hy weggekruip het.”

Mokgwabone sê die motief vir die voorval is nog nie bekend nie. “Die saak word nie met die huidige staking in die platinumgordel verbind nie.”