Die polisie in Namakgale, Limpopo, het ʼn grootskaalse soektog van stapel gestuur na ʼn man wat na bewering sy vrou doodgeskiet het.
Die voorval het glo Sondag omstreeks 12:00 in die egpaar se huis in Rockview in Namakgale plaasgevind.
Volgens brig. Motlafela Mojapelo, polisiewoordvoerder, het lede van die gemeenskap glo ʼn geweerskoot vanuit die egpaar se huis gehoor en ondersoek gaan instel. Met hul aankoms by die huis het hulle die 31-jarige vrou, geïdentifiseer as Vivi Moropane, in ʼn plas bloed aangetref. Sy het nie meer asem gehaal nie. Paramedici het haar later op die toneel dood verklaar.
“Moropane is as die vrou van die verdagte geïdentifiseer,” bevestig Mojapelo.
“Voorlopige ondersoek dui daarop dat die verdagte Moropane geskiet het en daarna in ʼn BMW van die toneel gevlug het.”
Lt.genl. Thembi Hadebe, die provinsiale polisiekommissaris in Limpopo, het egpare versoek om hulle te weerhou van geweld ten tyde van huishoudelike uitdagings.
Enigiemand met meer inligting wat tot die verdagte se inhegtenisneming kan lei, kan lt.kol. Lilian Mahlathi by 082 469 1240 kontak of die Stop Misdaadnommer by 08600 10111 skakel.