Man sterf buite hospitaal ná hy glo weggewys word

Die liggaam buite die Tshwane-distrikshospitaal. (Foto: Lynette van der Merwe)

Die Tshwane-gesondheidsdistrik sê hy stel ondersoek in ná ʼn man Dinsdagaand buite die Tshwane-distrikshospitaal dood is. Die man is na bewering vroeër weggewys omdat hy “te vuil” was om behandel te word.

Lynette van der Merwe, ʼn lid van die plaaslike buurtwag in die omgewing, het aan Maroela Media gesê sy en haar man, Hardus, is Dinsdagaand na die hospitaal uitgeroep, ná berigte dat ʼn liggaam buite die hospitaal lê.

Met hulle aankoms het iemand reeds die liggaam met ʼn duvet toegegooi. Volgens omstanders was die persoon ʼn inwoner van Melgisedek, ʼn vervalle gebou in Riviera waar talle haweloses woon. Van die ander inwoners het by die man se liggaam saamgedrom.

“[Die omstanders] het gesê die persoon het ernstige longontsteking gehad en dat hy vroeër die dag na die hospitaal toe is vir hulp. Die hospitaal wou hom na bewering nie help nie en personeellede het glo vir hom gesê dat hy vuil is en hulle hom gevolglik nie in die hospitaal kan toelaat nie,” het Van der Merwe verduidelik.

Die man het buite die hospitaal, in Dr. Savageweg inmekaargesak. ʼn Motorwag het hom tot op die sypaadjie gehelp, waar hy ʼn ruk later gesterf het.

Van der Merwe het bygevoeg hulle het self tevergeefs probeer om ʼn ambulans of polisievoertuig te oortuig om by die liggaam stil te hou. Hulle het uiteindelik die Pretoria-Sentraal-polisiestasie gekontak wat gereël het dat die persoon weggeneem word.

“Dit is vir my skokkend dat hy hulp geweier is,” het Van der Merwe gesê.

Volgens Mothomone Pitsi, hoofdirekteur van die Tshwane-gesondheidsdistrik, dui voorlopige inligting daarop dat die oorledene nié by die hospitaal om hulp aangeklop het nie.

“Dit lyk in die stadium of die man by ʼn snoepwinkel buite die hospitaal gesterf het. Volgens die hospitaal het hulle die voorval ondersoek en bevind dat die persoon nié in die hospitaal was nie,” aldus Pitsi. “Hy het skynbaar daar verbygestap, besluit om te rus en nie weer opgestaan nie.”

Volgens hom is daar egter bewerings dat dit nié die geval is nie en hy het gevra dat enigeen met meer inligting oor die voorval na vore sal kom. “Ons is besig om inligting te versamel om vas te stel presies wat gebeur het,” het Pitsi bygevoeg.

Maroela Media het ook die polisie om kommentaar genader en wag op terugvoer.

Dié beweerde voorval is een van verskeie die afgelope ruk wat ernstige vrae oor die gehalte van gesondheidsorg in die stad laat ontstaan het. Maroela Media het Woensdag berig ʼn ondersoek is gelas nadat ʼn vrou Maandag by die hek van die Stanza Bopape-kliniek in Pretoria moes kraam. Die kliniek het die vrou weggewys en na die Mamelodi-hospitaal verwys sonder dat sy ondersoek is. Sy het nie verder as die hek gekom toe die baba gebore is nie.

Pitsi het die vrou, haar familie en die gemeenskap reeds vir dié voorval om verskoning gevra.

Die LUR vir gesondheid in Gauteng, dr. Bandile Masuku, besoek intussen vanmiddag die 76-jarige Martha Marais, ʼn oumagrootjie van Eersterus wat einde Mei ʼn nag lank aan ʼn hospitaalbank in ʼn gang van die Mamelodi-hospitaal vasgebind gelê het. ʼn Video van Marais wat spartel om los te kom, terwyl haar dogter Stephnie hospitaalpersoneel soebat om haar ma te help, het opslae gemaak.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Anoniem

Afskuwelike en laakbare gedrag! Skreiende skande!!

AI AI

Ai dit is so hartseer ….nee regtig hoor …die hospitale moet staff in kry wat mense wat siek is wil help maak nie saak wat nie …sit handskoene aan dan … :-(

Oath

Just another example of how the doctor’s oath means nothing anymore. Says alot about their honour and integrity…

Johan

Belaglik! Mag die verantwoordelikes eendag verantwoording doen.

Pieter Bruyns

‘n maand gelede was ek weg gewys deur ‘n jnr dokter wat geweier het on my te behandel. Hy het gese hy doen net nood gevalle en het nie tyd vir my nie. Ek is n staats pensioenaris en kry behandeling vir copd. Na heeldag se wag moes ek loop en nou sit ek maar by die huis sonder enige medikasie.