Argieffoto
ʼn Man, vermoedelik in sy 40’s, is Vrydag in ʼn industriële ongeluk in Bethal in Mpumalanga dood.
Russel Meiring, woordvoerder van ER24, het gesê die voorval het omstreeks 07:50 plaasgevind.
“By paramedici se aankoms op die perseel is die man op die grond tussen ʼn stootskraper en ʼn groot industriële masjien aangetref. Die man het verskeie ernstige beserings opgedoen en was in ʼn kritieke toestand,” het Meiring gesê.
“Alle moontlike pogings is vir ʼn geruime tyd aangewend om die man te stabiliseer, maar hy is ongelukkig op die toneel dood.”
Die omstandighede rakende die ongeluk is onbekend. Beamptes was op die toneel en stel ondersoek in.
