Man sterf in nóg ʼn Limpopo plaasaanval

windpomp_Reint_Dykema_1.jpg

Argieffoto: Reint Dykema

ʼn Boer van die Lephalale-gebied (Ellisras) in Limpopo, is dood nadat hy Maandag in die vroeë oggendure oorval en erg aangerand is.

ʼn Lid van Heritage Protection Group (HPG) het aan Maroela Media gesê min inligting is sover beskikbaar, aangesien hulle nog oppad is. Hy het bevestig die boer is lewend gevind, maar het oppad na die hospitaal aan sy beserings beswyk.

Die verdagtes het glo in die boer se voertuig gevlug. Dit is nog nie duidelik hoeveel verdagtes by die aanval betrokke was, of wat gesteel is nie.

Die provinsiale polisiewoordvoerder kon nie vir kommentaar bereik word nie.

Dit is die tweede aanval in die gebied nadat ʼn boer Sondag op ʼn kleinhoewe buite Tzaneen aangeval is. Marius Jacobs, stigter van die Watchdog Tzaneen-inisiatief, het die aanval laat Sondagaand aan Maroela Media bevestig en gesê verskeie vuurwapens is tydens die aanval gesteel. Die boer is erg aangerand en in die hospitaal opgeneem, maar dit is nie duidelik hoe ernstig hy beseer is nie. Drie aanvallers het glo te voet gevlug.

ʼn Bejaarde vrou van Mookgophong (Naboomspruit) is Vrydag dood in haar huis aangetref nadat sy vermoedelik met ʼn nylontou verwurg is. ʼn Buurman van Pats Truter (79) het op haar liggaam in haar motorhuis afgekom. Niks is uit die huis gesteel nie en die polisie kon nog nie die motief vir die moord bevestig nie.

Intussen is nog ʼn man Vrydag in die vroeë oggendure in die Leeupoort-vakansiedorp, in die Rooiberg-distrik buite Bela-Bela, doodgeskiet. Drie onbekende mans het ʼn baksteen gebruik om die venster van Daniel en Emmarentia Killian-Jacobs se huis te breek. Daniel (62) is doodgeskiet, maar Emmarentia (61) kon daarin slaag om in die badkamer weg te kruip en met haar selfoon hulp te ontbied.

ʼn 84-jarige man is op 24 Januarie op ʼn kleinhoewe buite Bela-Bela oorval en erg aangerand. Sy honde is tydens die aanval doodgeslaan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

36 Kommentare

jongste oudste gewildste
Rve

Tragies dat die mense so afgemaai word, maar ek is bly om te sien die aanvalle haal meer en meer die nuus.

Lollie

Dit is voorwaar baie kommerwekkend. Glo al hierdie aanvalle en moorde haal nie maroela media nie. Ons sal seker nooit van alles te hore kom nie.

Wimpie

Wanneer gaan wie wat doen omtrent die moorde. Is dit dan nie al duidelik dat dit gaan om die boere uit te moor nie. Genade moet ons dan net aanvaar ons word uit gemoor….

Eugene

Dit is barbaars erger as isis!

Annie

WREED, WREED, WREED dis al wat mens elke dag in die koerant lees en wat doen die DA omtrent dit – ANC sal niks doen nie – hulle kry lekker.