Man swaar gestraf vir veelvoudige moorde

(Argieffoto)

ʼn 38-jarige man van Lesotho is Dinsdag in die hooggeregshof in Middelburg, Mpumalanga, swaar gevonnis vir die moord op vyf mense.

Volgens brig. Leonard Hlathi, woordvoerder van die polisie, is Teboho Thokoane, ook bekend as Maphoshane, gevonnis tot lewenslange tronkstraf op vyf klagte van moord, tien jaar vir poging tot moord, sewe jaar vir die onwettige besit van ʼn vuurwapen en twee jaar vir die onwettige besit van ammunisie. Die hof het beveel dat die laaste drie vonnisse gelyktydig uitgedien sal word.

Maroela Media het vroeër berig Thokoane was een van vier gewapende mans wat in Oktober 2017 ’n motor in Evander gehuur en na die Steyn-informele nedersetting digby Ogies in Mpumalanga gery het. Daar het hulle op ses mense losgebrand voordat hulle in die huurmotor op die vlug geslaan het.

Vier van die slagoffers is destyds op die toneel dood, terwyl die ander twee na ’n nabygeleë hospitaal gehaas is. Een van die slagoffers het kort daarna in die hospitaal aan sy beserings beswyk terwyl die sesde slagoffer die aanval oorleef het.

Thokoane is ná ’n ondersoek in Evander in hegtenis geneem in verband met hierdie koelbloedige moorde. Die ondersoekspan is later ingelig dat die ander drie verdagtes tydens ’n bakleiery in Evander dood is.

Thokoane het toe op 15 Desember 2020 alleen in die beskuldigdebank gestaan terwyl hy skuldig bevind is aan moord, poging tot moord en die onwettige besit van ʼn vuurwapen en ammunisie.

“Die polisiebestuur in Mpumalanga is verheug oor die swaar vonnis. Hulle glo dit is ʼn waarskuwing vir ander misdadigers dat hul misdrywe hulle vir lank agter tralies sal laat beland,” sê Hlathi.