ʼn 29-jarige man is Dinsdag in die Mhala-streekshof in Mpumalanga tot lewenslange tronkstraf gevonnis nadat hy skuldig gepleit het op aanklag van verkragting van ʼn 82-jarige vrou in Januarie 2017.
Monica Nyuswa, woordvoerder van die Nasionale Vervolgingsgesag (NVG) in Mpumalanga, sê Regiment Maluleke het in die hof vertel hy het na die bejaarde se huis in Newton Trust, digby Bosbokrand in Mpumalanga, gegaan en gemaak asof hy op soek is na sy vriendin. Hy het die bejaarde alleen in die huis aangetref. Hy het in die hof erken dat hy haar daar verkrag het.
“Die aanklaer, Matume Maake, het aan die hof gesê dat Maluleke nie skuldig gepleit het omdat hy berou het nie, maar weens die DNA-getuienis wat hom aan die verkragting verbind. Hy het aangevoer dat Maluleke ʼn ernstige oortreding gepleeg het en swaar gestraf moet word,” sê Nyuswa.
Nyuswa sê Maake het die staat versoek om Maluleke ʼn swaar vonnis op te lê ten einde ouer vroue te beskerm wat kwesbaar is vir misdadigers wat hulle as maklike teikens beskou. “Die slagoffer het emosionele spanning opgedoen en ook liggaamlike beserings gehad,” sê sy.
Die landdros, Elmarie Theron, het geen wesenlike en dwingende omstandighede gevind om van die voorgeskrewe minimum vonnis van lewenslange tronkstraf af te wyk nie
Die direkteur van openbare vervolging, adv. Matriek Luphondo, het die skuldigbevinding en vonnis verwelkom in die lig van die huidige vlaag voorvalle van geslagsgebaseerde geweld in die land.
Mooi so landdros Theron – u moes nog net gelas het dat hy nie vir parool in aanmerking mag kom nie.
Liewe aarde… as ‘n man darem SO spils raak dat hy ‘n 82-jarige verkrag dan is daar wraggies net die tronk en inmates oor vir hom.