Man tydens huisroof in rug geskiet

Foto: Netcare 911

ʼn Man is Vrydagaand in ʼn ernstige toestand na ʼn hospitaal gehaas nadat hy tydens ʼn huisrooftog in Krugersdorp in die rug geskiet is.

Die voorval het omstreeks 21:40 by ʼn huis in Mindalore gebeur.

Kapt. Appel Ernst, woordvoerder van die polisie, het gesê ʼn 64-jarige man en 57-jarige vrou was in die woonkamer toe hulle deur ʼn gewapende rower gekonfronteer is. Die rower se vier makkers het kort daarna by hom aangesluit.

“Die eerste rower het ʼn vuurwapen op die egpaar gerig en die vrou vasgebind. Die ander vier rowers, gewapen met ʼn breekyster en ʼn piksteel, het die man glo deur die verskillende vertrekke van die huis geneem om waardevolle items bymekaar te maak,” het Ernst gesê.

Die man is daarna ook in die woonkamer vasgebind.

In hierdie oomblik het die egpaar se huurder, ʼn 48-jarige man, die huis binnegekom en ʼn struweling het tussen hom en die rowers ontstaan. “Die huurder is in sy rug geskiet en die vrou is met die piksteel op haar rug aangerand.”

Die rowers het daarna op die vlug geslaan.

Shawn Herbst, woordvoerder van Netcare 911, het gesê paramedici is na die huis ontbied waar hulle ʼn man met twee skietwonde in sy rug aangetref het. Hy was in ʼn ernstige toestand. Paramedici het die man op die toneel behandel voordat hy na ʼn hospitaal geneem is.

Ernst het gesê die voorval word deur die Wesrand-trio-taakspan ondersoek. Enigiemand met meer inligting word versoek om dit by Stop Misdaad by 0860 010 111 aan te meld. Inligting kan anoniem deurgegee word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
Koos

Asof Krugersdorp nie reeds rof genoeg is nie.

Boerseun

Vra die ANCom die skuldiges te help vastrek – dis hulle ondersteuners en lede wat so plunder, verkrag en vermoor. Feite!

Boeremeisie

My hart breek vir ons mense!!! Tydens ons huisroof 4 jaar gelede, was daar ook 5. Die een met die pik het ons voordeur met een slag oopgekap. Dit was nie 30 sekondes nie, toe is al 5 in die huis………

Dorothea

Ek voel so jammer vir julle wat gebeur het. Verlede week Donderdag was dit ons beurt. Hulle was vyf. Ons Sukkel nog om van die trauma te herstel.

Penellope Jones

Kriminele het die oorhand.
Hulle doen wat hulle wil, waar hulle wil, wanneer hulle wil, met wie hulle wil.
Suid-Afrika het nie ‘n regering wat misdaad wil vasvat nie – hulle kyk eerder anderpad want as hulle dit nie sien en hoor nie, dan het dit mos nie gebeur nie. . . .