Man tydens plaasaanval in kop geskiet

[OPVOLG] Johnny Muller is Sondag na ‘n hospitaal in Bloemfontein oorgeplaas. Lees die opvolgberig hier.

windpomp_Reint_Dykema.jpg

Foto: Reint Dykema

ʼn Man is Sondag in die vroeë oggendure tydens ʼn aanval op ʼn plaas in die Frankfort-distrik in die Vrystaat in die kop geskiet.

Marius Müller, nasionale operasionele koördineerder van AfriForum, het aan Maroela Media gesê Johnny Muller en sy vrou is ná middernag op die plaas oorval. Johnny is glo in ʼn kritieke toestand na ʼn hospitaal in Bethlehem gehaas.

Ao. Lorraine Earle, woordvoerder van die polisie, het gesê die egpaar het omstreeks 01:00 by die huis aangekom. Terwyl die vrou in die kombuis besig was, het sy iets buite die huis gehoor. Johnny het uitgestap om ondersoek in te stel en is toe in die kop geskiet.

“Twee aanvallers het ʼn vuurwapen op die vrou gerig en geld en vuurwapens geëis. Hulle het haar gedwing om die kluis oop te sluit en het met die boer se wit [Isuzu] enkelkajuit bakkie gevlug,” het Earle gesê.

Die NG Kerk Frankfort het Sondag op sy Facebook-blad ʼn inskrywing oor die voorval geplaas. “Voorbidding word gevra vir Johnny Muller wat gisteraand tydens ‘n plaasaanval in die kop geskiet is. Die koeël het sy brein gemis en hy is tans in Bethlehem ICU,” lui die inskrywing.

Marius het aan Maroela Media gesê Johnny is Sondagoggend na ʼn hospitaal in Bloemfontein oorgeplaas.

Earle het gesê niemand is nog in hegtenis geneem nie, maar ʼn soektog na die verdagtes is tans aan die gang. “Ons ondersoek sake van gewapende roof op ʼn plaas, poging tot moord en diefstal,” het sy gesê.

Die polisie het die publiek gevra om op die uitkyk te wees vir die gesteelde bakkie met registrasienommer FSR 383 FS. Enigiemand met meer inligting word versoek om kapt. Judith Swanepoel by 082 469 2528 te bel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

57 Kommentare

jongste oudste gewildste
Hanna

Hoeveel moet nog sterf, hoeveel? Wanneer is genoeg nou wragties genoeg? Ons land is stukkend… Wat gaan dit vat voor iemand kop verloor?

Chris Ws

Die terroriste is uitgeslaap.Hierdie mense was dop gehou en inwag.Na sononder gaan mens NIE na buite om ondersoek in te stel na wat ookal nie.Dis letterlik om jou dood te soek want die terroriste doen enige ding om jou uit te lok na buite waar hulle oe aangepas is vir swak lig maar joune nie.Dan staan jy geen kans nie al is jy gewapen.
Alle sterkte aan Johnny Muller.Mag hy spoedig en volkome herstel.

Haan

My innige simpatie aan oom Johnny en sy familie. Ek bedoel dit geensins nie onsensitief nie, maar die tyd vir “ondersoek instel” sonder n vuurwapen is verby. Soos ek sê, ek weet glad nie wat die situasie was nie, maar as boere deesdae gewere (veral n pistool) in die kluis aanhou, ipv aan hul sy/byderhand, dan is dit net nog wapens wat in die vyand se hande gaan opeindig.
Baie sterkte aan die familie

M'Lady

As die einde van die wereld maar gister gebeur het soos voorspel is, was ons nou verlos van die Godverlate land.

Jacqui

Wat my kwel is daar word min aanvalle gefnuik. Telkens word d Boere op die selfde manier uitoorlê. Dit is asof al die moorde ens nie insink nie. n Wapen hoort aan jou lyf. NIE in die kluis nie.