Man vas ná treine brand in Kaapstad

Foto: @MikMotala/Twitter

Die polisie in die Wes-Kaap het ʼn 30-jarige man in hegtenis geneem in verband met Sondag se voorval by die Kaapstad-treinstasie waar twee treine verwoes is.

Die verdagte is deur beamptes van die Passasierspooragentskap van Suid-Afrika (Prasa) voorgekeer waarna hy deur die polisie in hegtenis geneem is, het lt.kol. Andrè Traut, woordvoerder van die polisie, gesê.

“Beeldmateriaal is gebruik om die verdagte van Khayelitsha te identifiseer. Hy sal binnekort in die Kaapstadse landdroshof verskyn. Die moontlikheid van nog inhegtenisnemings kan nie uitgesluit word nie.”

Die skade van die brand beloop minstens R33 miljoen. Die brand het Sondag omstreeks 15:40 plaasgevind en twee treine op platforms 13 en 14 is verwoes toe sterk winde die vlamme van een trein na die ander gewaai het.

Foto: @MikMotala/Twitter

Brandbestryders was teen 16:15 op die toneel en die brand is net ná 19:00 geblus. Volgens Metrorail is alle treinbedrywighede by die stasie as voorsorgmaatreël gestaak.

Altesaam 12 treinwaens en 300 m kabels is verwoes. Geen personeel of pendelaars is egter beseer nie.

Metrorail sê in die verklaring die polisie is besig om kringtelevisiebeeldmateriaal na te gaan as deel van hul ondersoek.

Blade Nzimande, minister van vervoer, het vroeër gesê ʼn “sinistere mag” is besig om die Suid-Afrikaanse spoorwegstelsel te verwoes.

Nzimande het die aanval op die treinstasie in ʼn verklaring veroordeel. “Dit is nou onbetwisbaar dat daar ʼn sinistere mag aan die werk is om ons spoorwegstelsel te verwoes,” het hy gesê.

“Dit is ook duidelik dat hierdie mag meedoënloos en vasbeslote is om die ANC-regering se vordering en pogings om die Metrorail-diens te moderniseer in die wiele te ry.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Chris

Mooi so goeie werk nou kan mnr Blade vasstel van watter sinistere mag is hy. Indien hy van die A& C is sal ons nie hoor aan watter duistere mag hy behoort

Hannetjie

Ek hoop dat hierdie man baie swaar gestraf sal word.Dankie vir die polisie se vinnige inhegtenisname van die skurk

Verniel/ afbreek/ verwoes

Blade, ek ken die rerige naam vir die sogenaamde “sinistere mag” waarvan jy praat……

Manie

Hier geplant om brand te stig.

marous

Gee hom borg en ‘n prokureur , dan kan die saak vir jare sloer . lem en sy gesante kan maar op en af spring . Hulle het hard gebid vir hierdie wetteloosheid .