ʼn 36-jarige man is Dinsdag in hegtenis geneem in verband met die moord op Johan van der Berg (54), ʼn afgetrede tegnikus en sakeman.
Van der Berg is op 17 Oktober op ʼn kleinhoewe in die Groenbossie-omgewing in Port-Elizabeth vermoor.
Kapt. Sandra Janse Van Rensburg, woordvoerder van die polisie, het gesê die verdagte is by sy huis in die Lusaka-gebied in Kabega Park vasgetrek nadat polisie waardevolle inligting oor die moord ontvang het. “Hy is tans in polisieaanhouding en sal Vrydag in die Port Elizabeth-landdroshof verskyn op ʼn aanklag van moord,” het Janse van Rensburg gesê.
Sy het gesê nóg inhegtenisnemings word binnekort verwag.
Maroela Media het vroeër berig Van der Berg se liggaam is die Saterdagoggend deur sy eksvrou, wat in ʼn aparte huis op dieselfde hoewe woon, gevind. Hy is vermoedelik dood nadat hy met ʼn skerp voorwerp in die bors gesteek is. Sy huis is geplunder en vuurwapens, ʼn TV en ʼn DVD-speler is onder meer gesteel.
Wel gedaan, dit wys net dat ons nog steeds bekwame polisie beamptes in ons land het. Sterkte aan die familie.