Man veg om sy lewe ná bye hom takel

(Emer-G-Med)

Twee mans, tussen 30 en 35 jaar oud, is beseer ná ʼn swerm bye hulle Dinsdag getakel het.

Emer-G-Med-paramedici is na die toneel in Cosmo City in Roodepoort ontbied. Een man het meer as 100 bysteke opgedoen en hy was in ʼn kritieke toestand. Gevorderde ingryping moes gedoen word om hom te stabiliseer voor hy na ʼn nabygeleë hospitaal geneem kon word.

Die tweede man het slegs sowat 10 bysteke opgedoen en hy is op die toneel gestabiliseer en ook na ʼn hospitaal geneem.

Volgens berigte van die toneel het die eerste man verby die korf gestap toe die bye hom skielik getakel het. Die tweede man het hom te hulp gesnel.