Man verdrink in meer

Polisieduikers en paramedici is steeds op die toneel by die La Mercy strandmeer aan die KwaZulu-Natalse noordkus, waar ʼn man vroeër Vrydagmiddag verdrink het.

Chris Botha, woordvoerder van Netcare911, het gesê paramedici is omstreeks 14:00 na die toneel ontbied. Volgens ooggetuies het ʼn man in sy laat 40s in die strandmeer gaan swem, toe hy skielik onder die water verdwyn het.

“Ons het vasgestel die man het tot op die bodem van die meer gesink,” het Botha gesê. “Die polisie se soek-en-reddingspan is ontbied en hulle is tans besig om die man uit die strandmeer te haal. Die duikoperasie is steeds aan die gang en ons sal meer inligting kan gee sodra die man uit die water gehaal is.”

Dit is nie bekend of die man ʼn inwoner van die gebied of ʼn vakansieganger was nie.