ʼn 21-jarige man het Sondagmiddag by Pacaltsdorp naby George in die Wes-Kaap in die see verdwyn nadat hy ʼn familielid van verdrinking gered het.
Robert van Helsdingen, Wildernis-stasiebevelvoerder van die Nasionale Seereddingsinstituut (NSRI) het gesê die span is omstreeks 15:00 ontbied ná berigte ontvang is van ʼn verdrinking.
“By die toneel aangekom, is ʼn 23-jarige man op die strand behandel vir verdrinkingsimptome en hy is in ʼn stabiele toestand na die hospitaal geneem,” het Van Helsdingen verduidelik. “Hy het glo in systrome in die moeilikheid beland en is dieper in die see ingetrek. Hy kon egter die rotse bereik en uit die water kom. Die 21-jarige man het egter intussen in die water ingegaan om hom te help, maar het self onder die water verdwyn.”
ʼn Groot lug-, kus- en seesoektog is van stapel gestuur op soek na die vermiste man.
Annine Dormehl, woordvoerder van ER24, het bevestig die twee mans is familielede.
Dis baie hartseer. Sterkte aan die naasbestaandes.
Dis regtig verskriklik hartseer. Klink asof die oorledene ‘n baie spesiale, hulpvaardige, dapper mens was. My hart huil saam met julle.
Hoop hul vind hom. Baie jammer – hy is ‘n dapper jong man!