Man verloor tweede vrou in aanval op dieselfde hoewe

Jurie en Riekie Steenberg. Foto: Facebook

Jurie en Riekie Steenberg. Foto: Facebook

Jurie Steenberg se tweede vrou is Woensdag op dieselfde kleinhoewe, noordoos van Pretoria, vermoor as sy eerste vrou, meer as ses jaar gelede.

ʼn Familievriend het aan Maroela Media gesê Jurie het Woensdagoggend omstreeks 4:30 in sy huis op ʼn kleinhoewe in Leeuwfontein opgestaan om die honde buite toe te vat. “Toe hy uit die kamer stap, het drie mans hom ingewag. Hulle het op die boonste verdieping ingekom deur ʼn traliehek uit die muur te breek.”

Volgens die vriend het Steenberg vir sy vrou, Riekie, geskree om ʼn vuurwapen te kry. “Riekie het om die bed gehardloop om Jurie se rewolwer te kry, toe hulle haar geskiet het. Hulle het Jurie ook hierna geskiet.”

Jurie is glo agter in sy linkerskouer geskiet, waarna die koeël voor onder sy arm uitgekom het. Riekie is glo ook van agter af in die skouer geskiet. Die koeël het vermoedelik haar hoofslagaar of hart getref. “Jurie het ʼn ambulans en die polisie gebel en hy het nog met Riekie gepraat.”

Jurie sterk in die Netcare Montana-hospitaal aan. Volgens die vriend is sy toestand nie kritiek nie. “Hul selfone is weg en Riekie se trouring wat op die bedkassie was en Jurie se rewolwer is ook gesteel,” het die vriend, wat saam met die polisie op die toneel was gesê.

Jurie en Riekie is glo verlede jaar getroud. Jurie is die eienaar van Jurie Pale & Lapas in die noorde van Pretoria.

Jurie se eerste vrou, Suna, is in April 2010 op dieselfde kleinhoewe geskiet. Sy is twee keer in die kop en een keer in die been geskiet en was vir byna ses maande in ʼn koma voordat sy in Oktober dieselfde jaar oorlede is. Jurie was nie tuis toe Suna en sy ma aangeval is nie.

Sers. Sam Shibambo, polisiewoordvoerder, het vroeër aan Maroela Media gesê hulle ondersoek ʼn saak van huisroof, moord en poging tot moord. Niemand is nog in verband met die voorval in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

68 Kommentare

jongste oudste gewildste
Gallie Vermeulen

Dit is verskriklik hartseer wat hier gebeur het. Ek wens so iets nie my grootste vyand toe nie. Ek bid dat Jurie spoedig sal herstel maar die hartseer sal nooit verdwyn nie. Ek voel dat ons almal moet saam bid dat die Here ons sal lei en weer vrede bring in hierdie pragtige land van ons. Dit is barbaars wat hier gebeur het. Ek bid dat die polisie spoedig hierdie barbare sal aankeer.

Gemmertjie

EK RAAK DO KWAAD SAL N HARTAANVAL KRY EN MY HAAT WEER ERGER.
OM TE DINK DAAR IS BLANKES WAT WAPENS AAN HULLLE VERKOOP.

DIS SKRIKWEKKEND JYS NERENS MEER VEILIG NIE.

Luister

Ongelooflik tragies. Baie sterkte aan Jurie.

Lida

Jolene wat wil jy se?

jemma

Beste Maroela,
Hoe op aarde kan julle Jolene se e-pos plaas? Is dit nie laster nie?