Man weer in hof oor handgranaat-moord

ʼn Voormalige weermagkolonel wat daarvan beskuldig word dat hy sy vrou met ʼn handgranaat vermoor het, sal Vrydag in die Durban-landdroshof om borgtog aansoek doen.

Joel Mahoase (44) het op 29 Augustus na bewering twee M26-handgranate in die kombuis van hul Amanzimtoti-woning gegooi terwyl hy en sy vrou rusie gemaak het. Een van die granate het ontplof en sy vrou, Lesego, het ernstige beserings opgedoen.

Lesego is deur familielede na die Kingsway-hospitaal gehaas, maar is omstreeks 02:00 die volgende dag dood. Sy was ʼn lid van die lugmag en was by die militêre basis by die Bluff in Durban gestasioneer.

Mahoase, ʼn voormalige Umkhonto we Sizwe-lid, het verlede week vlugtig in die hof verskyn. Hy het gehawend gelyk en het net een skoen aangehad.

Lees alle vorige berigte oor die saak op Maroela Media.