Aphiwe Lihle Gulwa (33) is in die landdroshof in Oos-Londen vrygelaat op borgtog van R20 000 ná hy in hegtenis geneem is op aanklag van bedrog.
Kapt. Yolisa Mgolodela, woordvoerder van die direktoraat vir prioriteitsmisdaadondersoeke (die Valke), sê Gulwa was die alleen-direkteur van Lihle Izizi, ʼn maatskappy wat vir BTW by die Suid-Afrikaanse Inkomstediens (SAID) geregistreer is. Gulwa was ook ʼn geregistreerde belastingspraktisyn wat vir al die belastingsake van sy maatskappy verantwoordelik was.
“Hy het VAT201-opgawes deur middel van e-filing by die SAID ingedien vir 2019 en 2020 en ʼn terugbetaling van meer as R14 miljoen geëis. Dit was egter na bewering nie aan sy maatskappy verskuldig nie.”
ʼn Ondersoek deur die Valke se eenheid in Oos-Londen wat ernstige handelsmisdaad ondersoek, het Donderdag tot Gulwa se inhegtenisneming gelei.
Die saak is tot 11 Maart 2022 uitgestel vir regsverteenwoordiging.
Raak gulsig, sou nie die eerste Eis gewees het nie, is nou eers uitgevang, verstaan nie, Ek word gereeld geoudit en geen fout was gekry, en dit vir n paar rand.
Gulsigheid is ‘n spyker in die doodskis.