Refiloe Malope (31) word al byna ’n week vermis. (Foto: SAPD)
’n 31-jarige vrou van Limpopo word al ’n week lank vermis nadat twee mans haar glo in die kattebak van ’n wit Toyota-sedan geboender en weggejaag het. Die voorval het Maandag omstreeks 10:00 in die Kgaphamadi- informele nedersetting naby Groblersdal plaasgevind.
Brig. Motlafela Mojapelo, polisiewoordvoerder, het Sondag gesê ’n taakspan is intussen saamgestel om die vrou, Refiloe Malope, op te spoor.
Volgens Mojapelo het bure glo gesien hoe Malope hardhandig in die kattebak gedruk word voordat die voertuig in die rigting van Motsephiri laat spaander het. Die bure het die voorval glo gesien kort nadat hulle Malope histeries hoor gil het.
“Die slagoffer is na bewering deur een van die verdagtes genader wat aangevoer het dat hy hulp benodig aangesien sy voertuig onklaar geraak het. Toe die twee by die voertuig aankom het ʼn tweede verdagte skielik verskyn. Hulle het Malope in die kattebak gedwing.”
Die polisie is gevolglik ontbied waarna ʼn soektog na die slagoffer en verdagtes van stapel gestuur is.
Die motief agter die voorval is nog onbekend. Enigeen met inligting word aangemoedig om speurdersersant Amos Thekupi by 082 775 5462 te bel of die tolvrye nommer by 08600 10111 te skakel.
Arme vrou! Niemand is meer veilig op enige plek nie.