Twee mans is in hegtenis geneem sedert ʼn biokinetikus Donderdagoggend buite haar werkplek in Gqeberha ontvoer is.
Van Riana Pretorius is daar egter steeds geen spoor nie.
Kapt. Yolisa Mgolodela, woordvoerder van die Valke, het aan Maroela Media bevestig twee verdagtes is reeds in verband met Pretorius se ontvoering vasgetrek.
“Sy is egter nog nie gevind nie, maar die ondersoek duur voort.”
Mgolodela kon nie verder uitbrei oor die saak nie aangesien “die ondersoekspan vrees vir Pretorius se lewe”.
Ander nuusblaaie berig wel dat ʼn losprys reeds vir Pretorius geëis is.
Maroela Media het vroeër berig dat gewapende mans haar gegryp en in ʼn voertuig buite die Newton- mediese sentrum ingedwing het. Sedertdien is Pretorius nie met ʼn oog gesien nie.
Verskeie mense het reeds ʼn oproep op sosiale media gedoen om vir Pretorius se veilige terugkoms te bid.
“Bid asseblief dat sy veilig gevind sal word,” skryf ʼn kennis van Pretorius se gesin.
“Dié lot word op niemand toegewens nie.”