Manuel kap terug oor Ndlozi se ‘rassistiese’ uitsprake

Trevor Manuel. Foto: Karen Sandison/ANA

Trevor Manuel, voormalige minister van finansies en senior ANC-lid, het Donderdag ʼn EFF-verklaring wat onder Mbuyiseni Ndlozi se naam uitgestuur is as “rassisties en lasterlik” bestempel, nadat Ndlozi aangevoer het daar was nepotisme betrokke by die aanstelling van die nuwe taksbaas.

Manuel het gesê hy sal nie deur “skoolterrein-boelies” mishandel word nie en het daarop aangedring dat drie stellings wat deur Ndlozi gemaak is onvoorwaardelik teruggetrek word. Dit sluit in dat hy familie is van Edward Kieswetter, die nuutaangestelde kommissaris van die Suid-Afrikaanse Inkomstediens (SAID), en dat hulle sakeverbintenisse het.

“Mnr. Ndlozi moet bewyse verskaf vir die drie bewerings wat hy oor my gemaak het,” het Manuel gesê.

“Slegs ʼn verstand wat verdraai is in die verwoesting van apartheid kan ooit aanvoer daar is ʼn bloedverband tussen twee individue wat deur die apartheid-regime as bruin geklassifiseer is, wanneer die enigste ooreenkoms tussen hulle ʼn rasseklassifikasie is. Die onus rus nou op mnr. Ndlozi om te bewys dat hierdie verbintenis wel bestaan,” het Manuel gesê.

Edward Kieswetter is aangestel as die nuwe kommissaris van die Suid-Afrikaanse Inkomstediens. (Foto: Facebook)

Ndlozi het Woensdag in ʼn verklaring hom beroep op pres. Cyril Ramaphosa en Tito Mboweni, minister van finansies, om bekend te maak hoe die onderhoudproses vir die nuwe SAID-kommissaris hanteer is. Ndlozi het die proses as “geheimsinnig” bestempel en het voorgestel dat korrupsie en nepotisme daarby betrokke was.

Manuel het ook Ndlozi se stelling dat hy (Manuel) Kieswetter aangestel het as adjunkkommissaris by die SAID tydens sy termyn as minister van finansies, verwerp.

“[Ndlozi] beweer ek het, as destydse minister van finansies, vir mnr. Kieswetter as die SAID-adjunkkommissaris aangestel. As hy net die SAID-wet of die verslag van die Nugent-kommissie gelees het, sou hy geweet het die minister van finansies het geensins sulke magte nie. Hy moet daarom hierdie stelling terugtrek,” het Manuel gesê.

“Ek dring aan op ʼn terugtrekking van hierdie stellings of daar sal regstappe teen mnr. Ndlozi gedoen word,” het hy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Diefie

Mooi oom Trevor Manuel, sê hom.

waarheid

Sorry Trevor – jy was ook maar deel van hulle – dis nou te laat vir jou om witvoetjie te soek.
Jy het net te veel skade aan ons blankes aangerig.
So – wat jy saai – sal jy maai.

M

HOEKOM gee die media die EFF soveel media bloorstelling as hulle die 3 de grootste party is in die land. Ek verstaan dit nie. Hulle tree op soos 5 jariges en die media soos n onbeholpe moeders

Martin

Toe die ANC aan bewind gekom het het hulle met alle mag gepoog om nepitisme uit te roei net om hul eie maatjies in die poste aan te stel. Daardie selfde mense pleeg nepitisme in sy ergste graad toe (familie lede en vriende) alles onder die dekmantel van regstellende aksie en BEE.

Hoera

Goed so!