Marble Hall-ongeluk: Hof sal oor aanspreeklikheid besluit

Diaan, Janine en klein Dianiël. Foto: Facebook

Diaan, Janine en klein Dianiël. Foto: Facebook

Die gru-ongeluk buite Marble Hall waarin elf mense dood is en die Terblanche-gesin kritiek beseer is, word steeds ondersoek om te bepaal of iemand aanspreeklik gehou sal word.

Diaan Terblanche, sy vrou Janine en hul babadogtertjie Dianiël is ernstig beseer nadat hul Toyota Fortuner op 17 Mei omstreeks 18:00 op die R573 reg van voor teen ʼn bakkie gebots het nadat hulle glo ʼn vragmotor verbygesteek het. Elf van 13 plaaswerkers wat agter op die bakkie vervoer was, is op die toneel oorlede.

Kol. Ronel Otto, woordvoerder van die polisie, het Maandag aan Maroela Media gesê die ondersoek na die ongeluk is nog nie afgehandel nie. “Ons sal met ooggetuies praat en alle aspekte van die ongeluk ondersoek, waarna die bevindinge in ʼn dossier vervat sal word wat by die hof ingedien sal word. Die hof sal dan besluit of iemand vir die ongeluk aanspreeklik gehou moet word.”

Bewerings dat die bakkie se hoofligte nie gewerk het nie en dat die Fortuner die vragmotor by ʼn sperstreep verbygesteek het, kan nie in hierdie stadium bevestig word nie en vorm deel van die ondersoek, het Otto gesê.

Intussen word Diaan, Janine en Dianiël steeds in die Life Midmed-hospitaal in Middelburg behandel. Carla Terblanche, Diaan se suster, het gesê Janine sal Maandag van die waakeenheid na ʼn gewone saal oorgeplaas word. “Sy wag net vir haar rugstut voor sy oorgeskuif sal word. Sy sal ook dan vir Dianiël kan sien [vir die eerste keer sedert die ongeluk],” het sy gesê.

Diaan, wat Woensdag ʼn noodoperasie ondergaan het, is van die ventilator af gehaal en haal nou op eie sy asem, het Carla gesê. Hy sal ook binnekort na ʼn gewone saal geskuif word.

Intussen is die vier weke oue Dianiël steeds in ʼn ernstige toestand in die waakeenheid nadat haar arm en pelvis gebreek is en sy bloeding op die brein opgedoen het. “Haar toestand is nog dieselfde, maar sy lyk elke dag ʼn bietjie beter,” het Carla gesê. “Dit is maar moeilik om regtig te weet wat met haar aangaan omdat sy nog so klein is. Maar haar reaksies is net ongelooflik. Ons hou nie op bid nie en ons vat die positiewe uit elke bietjie inligting, want ons weet God kan ʼn wonderwerk verrig. Mens moet dit net glo en op Hom vertrou.”

Klik hier vir alle vorige berigte oor die ongeluk op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

8 Kommentare

jongste oudste gewildste
Tammy

Het die bestuurder van die bakkie n permit gehad om mense te vervoer? My man het vandag 3 mense agter op sy bakkie gehad en het n boete van R500 gekry omdat hy nie n publieke lisensie het nie. Sal die betrokkenes op hierdie saak ingaan asseblief want dis onwettig om mense sonder so n permit te vervoer.

Charlotte

Dank U Vader dat hulle almal beterskap toon ek bly biddend vir julle gesin.

Audrey

Louise… Wil jy nie maar net eers jou feite reg kry voor jy die man beskuldig nie, Dink jy vir een oomblik hy sou aspris sy gesin in die omstandighede plaas. Jy het geen reg om te sê hy is stupid nie. Jy ken hom nie eers nie. Ek weet nie wat is fout met jou nie. Inplaas daarvan om saam te staan beskuldig ons van link na regs alles en almal wat voorkom. Al een wat stupid is, is jy. Om so stupid komentaar te lewer. Om so stupid te wees om te sê hy moet aangekla word vir… Lees meer »

Nadia

EK stem honderd persent saam jou Audrey – Dit is niemand se plek of tyd om te oordeel nie. Mense dink nie wat hulle se nie en soveel seer en pyn gaan gepaard met dinge wat mense kwyt raak. Dit was ‘n ongeluk wat met enige van ons kon gebeur het. In plaas daarvan om mense te beskuldig gaan op jou kniee en se dankie dit is nie jy in daardie situasie is nie. Veral as jy die mense ken .. dit maak ons almal so seer om hierdie tipe van kommentaar te sien. Los die oordeel. Ons bid vir… Lees meer »

scalla

dit is menslik om foute te maak, dit was n ongeluk en hou op bespiegel, die gereg sal besluit, sterkte aan al die betrokke families.