Maskers in buitelug nie meer nodig – Ramaphosa

Pres. Cyril Ramaphosa (Foto: GCIS)

Die dra van gesigsmaskers wat die neus en mond bedek is nie meer verpligtend in die buitelug nie, maar wel nog binnenshuis.

Pres. Cyril Ramaphosa het die land Dinsdagaand toegespreek oor verwikkelings in die regering se reaksie op die Covid-19-pandemie. Die president se toespraak volg ná vergaderings met die nasionale koronavirusbevelsraad, die president se koördineringsraad en die kabinet.

Volgens Ramaphosa is die land gereed om na ’n nuwe fase in die bestuur van die pandemie te beweeg. Daar is tydens die vergaderings besluit om sekere van die Covid-19-regulasies te verslap.

Ramaphosa sê hoewel die pandemie nog ver van verby is, is die lewe (en ekonomie) stadig maar seker besig om terug te keer na normaal.

Die land verkeer tans in vlak 1 van die hantering van die pandemie.

“Die pandemie het die afgelope twee jaar ons lewens gevorm en verander hoe ons werk, reis, aanbid, sosialiseer en sport kyk. Dit het die loopbane van baie mense, sowel as die land se ekonomie verpletter,” het Ramaphosa gesê.

Volgens Ramaphosa word daar ná vier vlae van infeksie al hoe minder mense siek en word minder sterftes aangemeld. Hy sê die land se gesondheidstelsel het die afgelope twee jaar ook versterk in die bekamping van die pandemie.

Volgens wetenskaplikes het tussen 60% en 80% van die bevolking een of ander vorm van immuniteit teen die virus. Ongeveer 48% van volwassenes het ook ten minste een entstofdosis al ontvang.

Ramaphosa het aangedui dat die nasionale ramptoestand opgehef sal word sodra openbare kommentaar oor die voorgestelde konsepregulasies afgehandel is. Lede van die publiek het kans tot Vrydag 15 April om kommentaar op of vertoë oor die voorgestelde regulasies in te dien.

“Dit beteken wel nie die einde van die pandemie nie, dit beteken net dat die wyse hoe ons dit bestuur, verander. Ons gaan steeds met die virus in ons midde leef.”

Ramaphosa het die volgende aangepaste regulasies aangekondig:

  • Byeenkomste word toegelaat met ʼn maksimum van 50% van die venue se kapasiteit binnenshuis en in die buitelug. Daar is wel ’n vereiste dat persone wat die byeenkomste wil bywoon ’n bewys van inenting kan toon of ’n PCR-toets wat nie ouer as 72 uur is nie.
  • Bywoning van begrafnisse word opgestoot van 100 tot 200 persone.
  • Die dra van gesigsmaskers wat die neus en mond bedek, is steeds verpligtend binnenshuis in die openbaar, maar nie in die buitelug nie.
  • Die regulasies met betrekking tot sosiale distansiëring is nou 1 meter pleks van 1,25 meter. Dit geld egter nie skole nie.
  • Internasionale reisigers wat die land wil binnekom, moet ’n bewys van inenting toon of ’n PCR-toets wat nie ouer as 72 uur is nie.

Hierdie maatreëls sal Woensdag in die Staatskoerant publiseer word en is meteen van krag.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

35 Kommentare

jongste oudste gewildste
Pietertjie

Dit laat my dink aan ‘n bosluis: die pote is al af, die lyf is al vrot, maar die kop byt vas vir ‘n vale.

Die noodtoestand is net om tyd te koop, anders word die verspreiding en toediening van ongetoetste en ongesertifiseerde “medikasie” onwettig. Sosiale afstand en ongesertifiseerde “maskers” het net mooi niks meer te doen met ‘n pandemie nie.

Die covid-wa se wiele het laaankal afgeval.

Corne123

Ag asb tog ook gese hy moeg vir maskers maar dan die kopdoek sit op sy kop ons sal nooit die einde sien nie winter kom nader en gettal gaannweer stug so voor ons weet is ons weer op vlak 3 kyk maar

huisvanisrael

Maskers werk nie, het nog nooit gewerk nie en sal nie werk in die toekoms nie. Jy kan net sowel ‘n onderbroek oor jou kop trek.

Strandloper

Jy is lankal ook nie meer nodig nie. Doen ons almal n guns en fire jouself asb

Zasskia

Wat ‘n grap Mnr die President. Bly ek het nie my tyd gemors om na hierdie snert te luister nie. Same old same old. Net mooi niks het verander nie.