‘Massa-grondbesettings kom op 31 Desember’

Andile Mngxitama, die leier van Black First Land First (BLF), en sy adjunk, Zanele Lwana, praat met verslaggewers in Pretoria. Foto: Jonisayi Maromo/ANA

Andile Mngxitama, die leier van Black First Land First (BLF), het Woensdag gesê die organisasie maak gereed om uitgebreide grondbesettings reg oor Suid-Afrika uit te voer, wat volgende jaar nog verder verskerp sal word.

“Swart mense het nie grond nie. Ons het nog heeltyd net klein deeltjies hier en daar gevat, maar nou vat ons meer en meer. Julle sal sien dat hierdie veldtog gaan verskerp. Die nag van 31 Desember is die nag wat ons gaan seker maak ons is gereed. Ons is besig om grondonteieningkomitees reg oor die land op die been te bring om wit gesteelde grond te identifiseer,” het Mngxitama aan verslaggewers in Pretoria gesê.

“Ons gaan inbeweeg. Julle sal vanaf die begin van Januarie 2018 massiewe grondbesetting sien. Maar hierdie Saterdag al het ons ʼn grondbesetting in Ekurhuleni, so dit gaan voort. Dit is alles net deel van die kleedrepetisie. Ons is ook besig om ʼn landboukollege op te stel om ons mense te leer hoe om grond [boerdery] op ʼn alternatiewe manier te doen.”

Mngxitama het gesê BLF het ook ʼn aanmaningsbrief van die “rassistiese, ekstremistiese en kriminele organisasie AfriForum” ontvang waarin BLF gemaan word om op te hou om te dreig om grond te beset.

“AfriForum is ʼn spul gronddiewe. Soos hulle aangaan, sal ek seker maak hulle verlaat hierdie land. Ons sal nie toelaat dat gronddiewe soos AfriForum ons boelie deur die howe te gebruik nie. Ons het ʼn brief van hulle prokureurs af ontvang wat sê ons moet ons daarvan weerhou om te sê ons gaan die grond terugvat. Dit is absolute nonsens,” het Mngxitama gesê.

Mngxitama het joernaliste by die Mededingingskommissie toegespreek kort nadat die BLF-leierskap ʼn vergadering met kommissaris Tembinkosi Bonakele gehad het. Volgens Mngxitama is een van die kwessies wat bespreek is die boetes wat maatskappye opgelê word wanneer daar bevind word dat hulle by korrupte aktiwiteite betrokke was.

Hy het gesê volgens wet kan die maatskappy tot ʼn maksimum van 10% van sy jaarlikse omset beboet word, maar BLF voer aan boetes moet 100% van die jaarlikse omset wees. “Ons het ʼn baie deeglike gesprek gehad oor die noodsaaklikheid om die wet in hierdie verband te verander. Ons gaan hard druk en met LP’s en ander rolspelers praat om seker te maak dat hierdie kwessie opgelos word.”

Hy het gesê BLF voer ook aan dat korrupte maatskappye persoonlik aanspreeklik gehou moet word vir hierdie misdade. “Hierdie mense kruip agter die maatskappye weg. Byvoorbeeld die konstruksiekartel wat van ons gesteel het in die tyd rondom die FIFA Wêreldbeker. Hulle was maar te bly om die 10% te betaal en hulle was betrokke by die sameswering. Kom ons noem dit korrupsie, want wit korrupsie word samespanning genoem in hierdie land. Daardie wit bestuurders het miljarde by ons mense gesteel en het net ʼn bietjie geld betaal om skotvry daarvan af te kom,” het hy gesê.

Mngxitama het ook verwys na die beslissing van die hooggeregshof in Johannesburg wat vroeër vandeesmaand ʼn interdik aan die Suid-Afrikaanse Nasionale Redakteursforum (Sanef) uitgereik het om BLF te verhoed om om joernaliste te dreig en te intimideer.

“Ons het geen stryd verloor nie. As daar enige joernalis daar buite is wat ons uitvind rassisties is, sal ons met hulle afreken. Daar is geen stryd wat hier verloor is nie. Die stryd gaan voort. Inteendeel, die stryd het nou net begin. Wys vir ons ʼn rassis en ons wys vir jou hoe hanteer ons ʼn rassis sommer baie vinnig. Rassisme moet nou tot ʼn einde kom. Niemand kan gemaklik daarmee wees dat die hof besluit het rassiste het die reg om rassisties te wees nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

77 Kommentare

jongste oudste gewildste
Anton van C

Dis nou die ‘redenasie’ wat jy kry van iemand wat gepraat het voordat hy self gedink het of iemand anders gevra het om hieroor te dink

Trappies

Wil hulle nou n kollege oopmaak om te leer boer. Wat het hulle dan gedoen toe hulle saam met n boer op die plaas gewerk het – niks geleer?

Ronnie

Die man herinner my aan Juju so 6 jaar gelede. Hy was ook deel van die ANC en het hulle fluisteringe in die publiek uitgeskree. Dieselfde met hierdie man. Ek dink hierdie organisasie word deur die regerende party befonds en ondersteun want hulle het steun verloor. Dis die ANC se teenvoeter teen die EFF.

Justice

Wat hulle glad nie verstaan nie – daar is `n wesenlike verskil in wil iets doen of het dit gedoen.

CAV

Begin maar eers by jou ANC ” comrades ” wat al 4500 plase gevat het, en nog niks daarmee gedoen het nie