Matie sterf tydens kaping

Hannah Cornelius. Foto: Facebook.

ʼn Vrouestudent aan die Universiteit Stellenbosch (US) is Saterdagoggend dood in ʼn kapingsvoorval terwyl ʼn mansstudent met ernstige beserings in die hospitaal opgeneem is.

Die liggaam van Hannah Cornelius (21) is Saterdagoggend op die Knorhoekpad buite Stellenbosch in die Wes-Kaap aangetref. Sers. Noloyiso Rwexana, woordvoerder van die polisie, het aan Maroela Media bevestig die liggaam is omstreeks 08:30 gevind “met beserings”.

“Drie mans het die blou VW Citi Golf [waarin Cornelius en ʼn vriend gery het] gekaap,” het Rwexana gesê.

Dit blyk dat die manstudent wat ook in die motor was ernstige beserings tydens die voorval opgedoen het en na ʼn nabygeleë hospitaal gehaas is vir mediese behandeling.

“Twee verdagtes, albei in hul 30’s, is in verband met die voorval in hegtenis geneem. Daar is beslag gelê op die gekaapte voertuig,” het Rwexana gesê.

ʼn Saak van moord, poging tot moord en kaping word deur die polisie ondersoek. Die ondersoek duur voort.

Intussen het Martin Viljoen, woordvoerder van die universiteit, gesê die kampusgemeenskap is geskok deur hierdie sinnelose daad. “Ons harte gaan uit na die familie en vriende van die student wat haar lewe verloor het, asook die student wat in die voorval beseer is. Ons is baie verlig om te verneem dat die SAPD twee verdagtes in verband met die kaping in hegtenis geneem het. Die oortreders moet met die volle omvang van die wet gestraf word.”

Prof. Wim de Villiers, rektor en visekanselier van US, het sy diepe meegevoel met die betrokkenes betuig: “Ons gedagtes is by die slagoffers van hierdie verskriklike daad is. Ons wens die beseerde student beterskap toe en sal alles in ons vermoë doen om bystand te verleen – ook aan die SAPD in hul ondersoek.”

Personeel van die US se afdeling studentesake was Saterdagaand met Cornelius se ouers oor die kaping in verbinding en het begin om ondersteuning te bied.

Die twee verdagtes sal Maandag in die Stellenbosch-landdroshof verskyn.

Lees ook: [OPVOLG] Drie in hof ná Matie se moord

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

75 Kommentare

jongste oudste gewildste
Riana

Dit is verskriklik hartseer. Innige meegevoel met die familie en vriende. Nog n sinnelose daad. Bid dat ons Hemelse Vader sal ingryp en ons Land sal red van die bose elemente.

Frans C

‘n Misdaadgolf is besig om ons land te oorweldig en te midde van dit word land op ‘n skinkbord weggee’Ons gedagte is by die ouers wat ‘n kind op so’n tagiese wyse verloor het.Daar is nie woorde wat die verlies kan beskryf en vertroosting bied nie.

john samuel

Waarskynlik uit die (bewegende) voertuig gegooi…
Ek kan myself nie groter smart indink as die wat die kind se Ouers nou ervaar nie……

‘Cry thy beloved country’….

Leendert

Gee my ‘n eiland waar ek en my vriende gelukkig kan wees, ongestoord. In my taal. Gee my ‘n skip waarmee ons na die vasteland kan reis om proviant te koop, ‘n kaptein wat omgee, wat ons vertrou, en ons veilig oor die waters neem ……

nicci.doula

My twee seuns van 19 en 21 studeer by Maties. “Too close too home…” My hart huil vandag oor hierdie pragtige meisiekind.