Maties-rektor betreur ‘aanranding’ en ‘rassistiese boodskap’

Universiteit Stellenbosch. Foto: Facebook

Universiteit Stellenbosch. Foto: Facebook

Prof. Wim de Villiers, rektor en visekanselier van die Universiteit Stellenbosch (US), het gesê dit is betreurenswaardig dat studente van die instelling hulle tot uitgebreide ontwrigting, beskadiging van eiendom en die aanranding van medestudente en personeel gewend het.

“Hierdie dade is onaanvaarbaar en benadeel – eerder as bevoordeel – die edele oogmerk om gehalte-hoëronderwys so toeganklik moontlik te maak.” De Villiers het gesê die ontwrigting van klasse, toetse en ander universiteitsaktiwiteite is onaanvaarbaar. “Dit maak inbreuk op die regte van studente om te studeer. Die beskadiging van eiendom en fisieke aanvalle is gewoon onwettig. Die universiteit doen tans die nodige stappe teen die betrokke studente.”

EWN berig ʼn personeellid gaan ʼn aanklag van aanranding aanhangig maak nadat sy glo deur betogende studente aangerand is. Die personeellid het aan EWN gesê sy moes ʼn dokter besoek na die voorval. Die betogende studente het glo haar foon gegryp, haar teen die grond vasgedruk, haar hare getrek en haar teen die kop geslaan.

Die WhatsApp-boodskap wat op sosiale media versprei word.

Die WhatsApp-boodskap wat op sosiale media versprei word.

Die universiteit het intussen ook bevestig hy neem kennis van boodskappe op sosiale media omtrent ʼn beweerde rassistiese opmerking deur ʼn student.

ʼn Student het glo op ʼn WhatsApp-groep gestuur: “Ingenieurs gebou: K****** have entered the building.” Volgens die universiteit is die saak reeds na sy eenheid vir gelykwaardigheid verwys om onmiddellik ondersoek te word en sal met die nodige erns wat dit vereis hanteer word.

“Rassistiese taalgebruik is onaanvaarbaar nie net kragtens die universiteit se dissiplinêre kode vir studente nie, maar ook wat betref die Grondwet van Suid-Afrika.”

De Villiers het gesê hy en die studentedekaan het Saterdag met ʼn groep ontevrede studente vergader nadat hulle die biblioteek beset het. “Daar was later ʼn onderneming deur die groep om nie verder die week akademiese aktiwiteite te ontwrig nie. Die situasie het Maandag verander en Dinsdag verder geëskaleer.”

De Villiers het intussen ook die aankondiging deur die minister van hoër onderwys dat die regering bykomende befondsing beskikbaar sal stel vir finansiële steun aan ʼn groter groep arm en werkersklas-studente, verwelkom. “Dit is ʼn stap in die regte rigting. Die US ondersteun klasgeldvrye hoëronderwys vir arm studente ten volle. Dit is eintlik die ideaal vir alle studente, maar dit is nie haalbaar in die huidige ekonomiese klimaat sonder substansiële bykomende besteding deur die regering nie.”

De Villiers het studente, hul ouers en personeel die versekering gegee dat die universiteit die situasie fyn dophou. “Ons het sekuriteitspersoneel en gebeurlikheidsmaatreëls ingestel, en sal in die belang van veiligheid optree.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

75 Kommentare

jongste oudste gewildste
Anti regering

Net as ‘n wit persoon aandadig is is dit rasisties en word daar streng opgetree en die media is aandadig want hulle implementeer dit met hulle politiese korrekte verslaggewing waar feite weerhou word omrede hulle nie die ras wil noem as die skuldiges nie wit is nie natuurlik.

m kruger

So dis ok om die univeristeit en sommer die hele land af te breek maar moet dit nie waag om rassisties te wees nie….. dan is jy diep in die moeilikheid..

Hendrik

Wel mense wat hulle wangedra word maklik name genoem. As hulle ordentlik is sal hulle nie hierdie sogenaamde rasistiese name hoor nie en die ordentlike mense sal dit nie gebruik nie.

William

Hendrik jy is so reg. Nou is die ou woordjie wat gebruik is groter moeilikheid as dit wat werklik aan die gang is. As persone nie die gebou op dreigende maniere betree het nie sal daai woord nie gebruik word nie. Studente is bang

m

Ag rerig begin hulle nou weer bedreig voel en nou gaan die hele wereld wee afgebreek word…… Hoe pateties.