Die voormalige DA-jeugleier, Mbali Ntuli, het aangekondig dat sy haarself verkiesbaar stel om in April by die DA se federale kongres tot partyleier verkies te word.
Sy is die derde persoon om as kandidaat na vore te tree. Die waarnemende DA-leier, John Steenhuisen, en die Wes-Kaapse provinsiale DA-leier, Bonginkosi Madikizela, het reeds hul onderskeie kandidature aangekondig.
Dit word verwag dat die Gautengse provinsiale DA-leier, John Moodey, ook ‘n kandidaat kan wees. Moodey het by navraag bevestig dat hy genader is om homself beskikbaar te stel, maar dat hy eers ‘n finale besluit sal neem nadat hy daaroor gebid en met sy gesin gekonsulteer het.
Ntuli is al sedert haar studentejare by die DA betrokke. Sy is bekend as ‘n uitgesproke ondersteuner en hegte vriendin van die voormalige parlementêre leier van die DA, Lindiwe Mazibuko. Sy het Samkelo Mgobozi, woordvoerder van die voormalige burgemeester van die Tshwane-metro in Pretoria, as woordvoerder van haar verkiesingsveldtog aangestel.
Sy is tans ‘n lid van die KwaZulu-Natalse wetgewer en is die party se verkiesingshoof in KwaZulu-Natal. Dit is die enigste provinsie waar die DA in verlede jaar se algemene verkiesing gegroei het.
Sy het haar kiesafdeling, Uthungulu (die gebied van Hluhluwe af noordwaarts tot by die Mosambiekse grens, uitgebou van ‘n area sonder enige DA-stadsraadslede na ‘n gebied waar die DA setels in elke stadsraad het.
Ntuli sal Vrydagoggend tydens ‘n nuuskonferensie in Johannesburg uitwei oor haar verkiesingsveldtog, beleidsvoorstelle en haar visie vir die DA.
Kan die DA haar vertrou?
En so word die VF+ nog groter
Wie?
Wonderlik. So gaan die VF+ wen.